Keflavik - London - Istanbul - Dubai

22.jan... 
Lúlli vakti mig rúmlega 4 am... og við vorum lögð af stað kl 5... að sjálfsögðu borðuðum við morgunmatinn á betri stofunni... það er frábært að byrja þar. Við áttum flug um kl 8 með Icelandair til London Heathrow. Þar biðum við í tæpa 4 tíma. Næsta flug var með Turkish Airline til Istanbul... Lággjaldaflugfélag en öll hugsanleg þjónusta innifalin. Við fengum matarbakka með heitum mat, köku og hvað sem við vildum að drekka með og þjónustan frábær. Í Istanbul biðum við í 2 og hálfan tíma og flugum áfram með Turkish Airlines til Dubai. Eins og áður var öll þjónusta í boði... heitur matur og allir drykkir, frí taska með svefngrímu, eyratöppum, flugsokkum og heyrnatól fyrir skemmtiefnið. Þá var leikjatölva í sætisbakinu... en báðar vélarnar voru 500 manna breiðþotur. Við lentum í Dubai um kl 7 um morgun... rúmum sólahring eftir að við fórum að heiman. 

Holiday Inn Express Dubai, Internet City, Knowledge City P.O. Box 282647 Dubai
Tel : [phone]   room 146

23.jan...
Við tókum leigubíl á hótelið... ég svaf örugglega ca 2 tíma í síðasta fluginu en Lúlli svaf eitthvað meira. Við fengum ekki herbergið strax. Við fengum að geyma töskurnar í lobbyinu og ákváðum að taka lestina og skoða hæsta turn í heimi. Lestarkerfið er ekki svo flókið og greiðslukerfið eins og í London. Við keyptum okkur kort með inneign og fórum út við Dubai Mall. Hvílíkir gangar frá lestarstöðinni í mollið (ég frétti seinna að það væri 1km) 
Neðst niðri í einu horni var selt upp í turninn... ég athugaði verðið... 580 aed á mann (100 usd eru 344 aed ) hvílíkt verð. Það væri um 34 þús fyrir okkur bæði og mengunin er mikil svo að skyggni er lélegt... þetta er ekki þess virði. Þegar við komum til baka fengum við herbergið og við borðuðum kvöldmat á hótelinu og fórum snemma að sofa.
Við upplifðum í fyrsta sinn kynjaskipta lestarvagna og strætó.

24.jan...
Við tókum strætó á hótelið þar sem gögnin voru afhent. Þetta var lítið expo. Ég fékk nr 1466. Maraþonið er á föstudegi sem er helgur dagur hér... Við kíktum í mollið hinu megin við götuna, fengum okkur að borða, kíktum á ströndina og tókum því rólega... og strætó til baka...  það var hlýtt og gott en alltaf þetta mistur í loftinu. Ég ætla ekki að ganga mig upp að hnjám fyrir þetta hlaup. Við vorum aðeins og sein að kaupa okkur skoðaunarferð á morgun, sölumaðurinn var farinn af hótelinu. 

25.jan...
Fyrst við misstum af skoðunarferð til Abu Dabi í dag ákváðum við að fara í enn eitt mollið, Mall of the Emerites... og ég sem ætlaði ekki að ganga mikið í dag EN það er víst ekki hægt að komast hjá því í útlöndum. Við gátum hamið okkur og vorum komin snemma á hótelið. Ég reyndi að fara snemma að sofa en gekk illa að sofna... svo hringdi mamma kl 10:30 með slæmar fréttir og ég svaf lítið eftir það.

26.jan...
Klukkan var stillt á 4 am til að komast í maraþonið... 
https://byltur.blog.is/blog/byltur/entry/2209927/

Ég þurfti að ganga rúman km frá markinu í strætó eftir hlaupið og svo varð ég að standa í strætó á leiðinni, því ég hafði hellt svo miklu vatni yfir mig á leiðinni að ég var blaut niður í skó. Ég byrjaði á að helgja fötin upp og leggja mig aðeins... ég komst ekki í sturtu strax út af nuddsárum... en eftir sturtuna fórum við út að borða, gengum frá dótinu og lðgðum okkur til kl 23 því á miðnætti áttum við pantaðan leigubíl upp á flugvöll.

27.jan...
Fyrsta flug hjá okkur var kl 2:40 til Istanbul. Það er frábært að ferðast með Turkish Airlines, þjónustan er frábær hvort sem það er nótt eða dagur. Fluginu seinkaði um hálftíma og við vorum aðeins stressuð yfir að ná næsta flugi en svo var meiri tímamunur en okkur minnti... næsta flug var með Turkish Airlines til London Gatwick og þaðan flugum við með Icelandair. Alltaf gott að koma heim.

Keflavík - Kaupmannahöfn - Kairó - Luxor 5-13.jan 2018

Fyrsta ferð ársins er til Luxor í Egyptalandi. Við gátum ekki flogið beint svo að við fórum með Icelandair til Kaupmannahafnar. Þaðan flugum við sama dag til Kairó með EgyptAir, þar sem við gistum í 3 nætur... Egypt Air fór svo með okkur til Luxor þar sem við gistum í 5 nætur.

5.jan... Flug til Kaupmannahafnar og þaðan til Kairó. Við fengum okkur leigubíl á flugvellinum og bílstjórinn Hassan var síðan með okkur þar til við flugum til Luxor. 

Golden Park Hotel Cairo Heliopolis
221 El Hegaz Street Cairo 11351 EG   
sími [phone] room 256

6.jan... Hassan var mættur kl 9 og við fórum fyrst á Papírus verkstæði þar sem við fengum sýnikennslu í gerð pappírs... þá fór hann með okkur að skoða fyrstu píramídana sem voru byggðir og söguna hvernig þeir breyttust með tíma og reynslu byggingarmanna. Hassan er fornleifafræðingur... við vorum heppin að fá mann sem vissi þetta allt.

Við skoðuðum grafhýsi og fórum inn í píramída. Göngin eru mjög brött og lág til lofts og því erfitt að fara niður í þau. Þá fórum við á Gisa svæðið þar sem frægustu píramídarnir eru. Þeir eru 3 stórir og nokkrir minni í kring. Sorglegt hvað þjóðin hefur verið rænd af gersemunum þeirra. Við fórum á svæði Bedúína og kameldýra þeirra... lífshættir þeirra hafa lítið breyst frá biblíutímum.
Á Gisa svæðinu var líka Sfinx-inn... engin smá stytta. Við borðuðum kvöldmat á veitingahúsi sem var með útsýni yfir Gisa svæðið. Hassan skilaði okkur um kl 5.
Kairó er mjög sóðaleg borg og það er stjórnvöldum að kenna... draslið safnast upp því það eru engin úrræði fyrir fólk að losa sig við það, fátæktin er mikil og sölufólk hræðilega uppáþrengjandi. Mengun er mikil og lögregla með hríðskotabyssur á hverju strái.

7.jan... við tókum því rólega til kl 3 eh, þegar við vorum sótt og keyrð á markaðinn. Það er viss upplifun en um leið erfitt að geta ekki skoðað neitt án þess að vera valtað yfir mann af uppáþrengjandi sölumönnum. Bílstjórinn beið eftir okkur kl 4:45 til að keyra okkur í skip. Við fórum í rúmlega 2ja tíma siglingu á Níl, siglingu sem innihélt mat og sýningu, magadans og sirkus/listdans... eða hvað það heitir.

8.jan... Eftir morgunmat fórum við með leigubíl í flugstöðina og tékkuðum okkur inn. Þar var stanslaus öryggisgæsla em tilheyrandi töskuskönnun... og í síðasta skanna fyrir flugtak tóku þeir af mér sport-tape og örsmá skæri... svo ég get ekki teypað tærnar fyrir næsta maraþon. Flugið tók um klst. Þegar við lentum tókum við leigubíl á hótelið Maritim Jolie Ville og sömdum við bílstjórann, Ali að sækja okkur daginn eftir. Við erum í hvílíkum lúxus hér... eins og Paradís.
Við borðuðum kvöldmat á buffeti hótelsins. Það vantað mikið upp á hreinlæti í mat í þessu landi og við erum komin með í magann.
Þegar skráði mig í maraþonið þurfti ég að kaupa pakka sem innihélt skráningu, 3 nætur á þessu hóteli, rútu til og frá starti/marki og verðlaunahóf með mat og skemmtiatriðum.

Maritim Jolie Ville Kings Island Luxor
Aswan Road - Kings Island Luxor EG
Sími [phone]... íbúð D6

9.jan... Ali var mættur kl 9 og fór með okkur út um allt. Fornminjar liggja hér eins og hráviður um allt... Við skoðuðum Konungadalinn, Drottningadalinn, Madinet Habu (Temple of Ramses) Deir El-Medina og Temple of Hatshepsut sem var rosaleg stórt og frægt musteri. Hvílík saga í kringum allt og ótrúlegt þrekvirki það hefur verið að búa til grafhýsin og skreyta þau að innan. Því miður mátti sjá veggjakrot frá síðustu öldum innan um heraklífurnar. Fyrir alger mistök umsjónarmanna, komst ég niður í grafhýsi Nefertari... það voru engin skilti, enginn vörður sem passaði innganginn en það kostaði 1000 le aukalega að skoða þessa gröf í Drottningadalnum.

https://www.youtube.com/watch?v=TBwj42bupJI

10.jan... Ali sótti okkur kl 10 og keyrði í Luxor Temple, Karnak Temple, Mummification Museum og svo skoðaði ég veginn milli hofanna tveggja en hann er í uppgreftri núna. Við borðum bara morgunmat og kvöldmat á hótelinu því við þorum ekki að borða annars staðar... en við sjáum að þeirra hreinlæti er ekki á sama stigi og okkar, það þykir ekkert tiltökumál að kreista brauð til að finna hvort það sé mjúkt... en skilja það svo eftir á bakkanum.  
Fjölbreytnin er mikil hjá þeim og við höfum ekki séð sömu réttina tvisvar á kvöldin. Við erum bæði orðin mjög slæm í maganum. 

11.jan... Í dag tókum við það rólega, láum í sólbaði, horfðum yfir hina frægu Níl og á bátana og skemmtiferðaskipin sem sigldu þar. Við erum á eyju í Níl... það eru verðir við brúna sem sprengjuskoða undirvagn bílsins og kíkja í skottið í hvert skipti sem við komum aftur á hótelið... þá þarf bílstjórinn að skilja ökuskírteinið sitt eftir í hliðinu. Við sáum líka verði við bryggjuna. Ég sótti númerið kl 16:30 í anddyri hótelsins og fékk síðustu upplýsingar fyrir maraþonið á morgun. Það var brúðkaupsveisla í hinu megin í matsalnum þegar við fórum í kvöldmat og skemmtiatriðin voru magadans og ljósa/sirkusdans eins og var í skipinu í Kairó.
Ég tók til hlaupadótið og við fórum snemma að sofa.

12.jan... Við vöknuðum 4:15... allt um Luxor Marathon á byltur.blog.is
https://byltur.blog.is/blog/byltur/entry/2209491/

Eftir maraþonið, tók ég það rólega... fór ég í sturtu og svo klæddum við okkur fyrir verðlaunahófið en enginn fékk verðlaunapeninginn afhentan í markinu. Þetta hóf var auðvitað bara peningaplokk eins og öll ferðamennskan hér. Við stoppuðum ekki lengi eftir matinn,(sáum þó magadansinn)... vegna þess að við áttum flug snemma í fyrramálið.

13.jan... Við vöknuðum 2:45, því við vorum búin að semja við Ali að sækja okkur kl 3:30. Það er um hálftíma keyrsla upp á flugvöll. Það er svosem gott að það sé góð öryggisgæsla en við fórum 4x í gegnum skanna og 6x sýndum við farmiðann. Við flugum kl 6 til Kairó... flugum kl 10 til Kaupmannahafnar... og kl 20 heim. Harpa sótti okkur upp á völl og það voru smá viðbrigði að koma í snjóinn og kuldann en ALLTAF gott að koma heim.

Áramóta annáll fyrir árið 2017

Gleðilegt ár 2018

Við Lúlli óskum öllum Guðs blessunar, gæfu og góðs gengis á komandi ári um leið og við þökkum fyrir liðin ár. 

Elsta langömmubarnið okkar er 6 ára í dag, nýjársdag og byrjar í skóla á þessu ári, hún á heima í Noregi. Elsku Emilía Líf krúttið okkar, innilega til hamingju með daginn þinn. Vonandi getum við einhverntíma mætt í afmælið þitt.

Síðasta ár (2017) var ótrúlega fljótt að líða og viðburðarríkt. 

FJÖLSKYLDAN 

Það varð ekki fjölgun í fjölskyldunni en alltaf gleðilegt þegar allt gengur sinn vanagang og öllum gengur vel. Við erum mjög stolt yfir öllum okkar börnum, barnabörnum og barna-barnabörnum en það má nefna að sonurinn byrjaði í lögfræði í Háskóla Íslands og hefur gengið vel í haust og Lovísa hljóp sitt fyrsta hálf maraþon.

STÓRAFMÆLI ÁRSINS

Harpa átti stórafmæli í október, varð 40 ára. Að venju á stórafmælum fórum við út að borða og að hennar vali í keilu á eftir.

FERÐALÖG

Við þreytumst ekki að ferðast, amk ekki ég. Ég fór 3 ferðir ein til USA, 1 stelpuferð með Lovísu og systrum mínum, 1 sinni með Svavari og 7 sinnum kom Lúlli með. Allar ferðirnar utan ein voru hlaupaferðir.
Þetta voru alls 12 ferðir til útlanda. 9 ferðir til USA og 3 til Evrópu en við Lúlli fórum til Rómar og Lissabon.... og við Svavar til London og Parísar.

Í ævintýraferð okkar Svavars skoðuðum allt það markverðasta í London auk hins víðfræga Stonehenge og tókum svo lestina til Parísar þar sem helstu ferðamannastaðirnir voru heimsóttir og merktir okkur.  

Vala og Hjörtur komu með okkur Lúlla til USA í maí/júní þar sem við heimsóttum Niagara fossana, Mount Rushmore, Devils Tower og fl. ekkert smá ævintýri þar.

HREYFING

Ég hljóp 16 heil maraþon á árinu... Við systur tókum ratleikinn eins og undanfarin sumur og að þessu sinni kláruðum við allar leikinn, fundum öll 27 spjöldin...

https://www.youtube.com/watch?v=w_3cW2WEQ6g&t=12s

ég fór nokkrar ferðir á Helgafellið mitt og eina ferð á Esjuna. Annað árið í röð varð ekkert úr því að ég færi Selvogsgötuna. Ég losnaði að mestu við meiðslin sem ég hef haft þannig að í haust sá ég fram á að geta farið að æfa meira... það gengur vel en ég þori samt ekki að fara of geyst í það. Við systur syndum áfram á föstudögum... ég hljóp eitthvað smávegis og hjólaði tvisvar í viku með Völu.

Þetta ár verður enn meira spennandi... og meiri ævintýri bíða :)

Hlaupa annállinn er kominn á http://byltur.blog.is/blog/byltur/

PS.

Ég braut blað er ég sótti um prestsembætti í fyrsta sinn haustið 2016... 2017 sótti ég um nokkur brauð... en kannski verð ég bara að baka þetta blessaða brauð sjálf.

Kef - Orlando 23-28.nóv 2017

23.nóv... Stelpuferð til Orlando. Lovísa kemur með í þessa ferð. Þess vegna fórum við á tveim bílum á völlinn. Lúlli keyrði okkur Lovísu en Edda og Berghildur fóru saman. Við Lovísa byrjuðum á betri stofunni og Edda kom síðan. Ferðin byrjaði vel, því við Lovísa fengum óvænt sæti á Saga Comfort.

Hins vegar gekk ekki allt snurðulaust eftir að við lentum. Við biðum óratíma eftir töskunum og ENN LENGUR eftir bílnum. Dollar átti enga bíla og fjöldi brjálaðra viðskiptavina beið fram eftir nóttu. Stelpurnar tóku leigubíl á hótelið og ég kom síðan á bráðabirgða bíl rúml 4 am.

.... gisting The Point
             7389 Universal Blvd. Orlando FL 32819,
             room 702H í Tower 1, Tel: [phone]

24.nóv... við keyptum okkur morgunmat á hótelinu og vorum mættar kl 9 að skipta um bíl. Svo byrjaði shoppið... Premium Outlet, Walmart, Florida Mall, Best Buy og fl.

25.nóv... við ákváðum að borða morgunmat á IHOP... þess vegna tékkuðum við okkur út snemma, borðuðum, versluðum og keyrðum síðan til Cocoa Beach. Þar byrjuðum við á því að sækja gögnin fyrir hlaupið og og skráðum okkur inn á Days Inn. Þetta er 5ta ferðin okkar og við erum í fyrsta sinn á annarri hæð. Við fórum að sofa um kl 8pm.

.... gisting Days Inn
             5500 N-Atlantic Ave, Cocoa Beach, FL 32931
             room 243, Tel [phone]

26.nóv... klukkan var stillt á 2:30 og við Lovísa fórum í Space Coast Marathon. Sjá byltur.blog.is Edda og Berghildur voru mættar við markið þegar ég kláraði maraþonið. Við fórum til baka með síðustu rútu. Lovísa fór hálft með glans. Eftir sturtu keyrðum við niður á Merritt Island og ætluðum að byrja í Walmart... en þegar við gengum inn voru allir á leið út og slökkviliðið á leiðinni. Þá var röðinni breytt... aðrar búðir og borðað og endað í Walmart... sem var aftur opið.

27.nóv... morgunmatur... pakkað og öllu dröslað aftur í bílinn... en það var ekki hægt að keyra aftur til Orlando án þess að kyssa ströndina okkar.  Í Orlando var haldið áfram að versla, Target, Dollar Tree, Outlettið og síðan síðasta nóttin og þriðja hótelið í ferðinni... þar sem allt verður að fara ofaní töskurnar.

.... gisting Four Points by Sheraton
             5905 International Drive Orlando FL 32819
             room 1014 Tel: [phone]

28.nóv...vaknað kl 7, keyptum okkur morgunmat á hótelinu en urðum fyrir hvílíkum vonbrigðum að við erum enn að jafna okkur... allt gert klárt fyrir heimferð. Við þurfum að sækja nokkra pakka, bæði í búðir og til Olgu. Við eigum flug heim kl 18 og vorum bara á síðustu stundu - þannig lagað.

Kefl - Orlando - Savannah GA

2.nóv
Auðvitað byrjaði í ferðina í betri stofunni. Lúlli keyrði mig á völlinn. Ég fór í loftið 17:15 og flugið tók um 8 klst... og 4 tíma munur í Florida. Eftirlitið gekk mjög hægt... en ég var með hangikjöt fyrir Olgu og fékk auka-meðferð. Ég lagði af stað til Jacksonville nákvæmlega 2 tímum eftir lendingu... keyrslan tók nærri 3 tíma... kom á hótelið um 2 um nóttina, talaði við Lúlla og fór beint að sofa.

     La Quinta Inn and Suites
     3199 Hartley Rd. Jacksonville FL 32257
     Tel: [phone]  room 233

3.nóv
Fékk mér morgunmat... hótelið var fullbókað af ráðstefnugestum babtista kirkna í Florida... ég passaði vel í hópinn og hefði alveg viljað vera með... en ég átti eftir að keyra í 3 tíma til Savannah...sækja gögnin og versla aðeins... og fara snemma að sofa... maraþon í hitabylgju á morgun. Verð í Savannah í 4 nætur.

     Days Inn Savannah airport.
     2500 Dean Forest Rd.Davannah GA 31408
     Tel [phone] room 117

4.nóv... sjá byltur.blog.is fyrir maraþonið
Það var rosalega heitt í maraþoninu, ég fann á leiðinni á hótelið að ég var rosalega brennd eftir fötin (nuddsár) og þess vegna keypti ég mér hamborgara í lúgu á leiðinni svo ég þyrfti ekki að fara aftur út. 

5.nóv
Ég svaf ágætlega en var samt alltaf að vakna. Tímanum var seinkað um klst í nótt. Eftir morgunmat ákvað ég að fara í nokkrar búðir og taka hlaupafötin og skóna með mér í poka. Ég byrjaði í Target og Dollar Tree. Ég var síðan mætt í Daffin Park kl 11 til að fá stæði. Það er ótrúlegur fjöldi sem hleypur 5k daginn eftir til að fá REMIX-gítarinn. Hlaupið var ræst kl 1 og hitinn fór í 28°c. Mér gekk ágætlega. Fór í nokkrar búðir á eftir og borðaði á Golden Corral.

6.nóv
það er fárvirðri heima og öllu flugi var aflýst... ég er ekki viss hvort ég hefði komist heim ef ég hefði ætlað í dag. Ég er í stöðugu sambandi við Bíðara nr 1. Í dag er bara búðaráp á dagskrá og að pakka og vigta töskur. 

7.nóv
Heimferð í dag... Einkasonurinn á afmæli, 34 ára. Eftir morgunmatinn lagði ég af stað. Ég var 4 og hálfan tíma að keyra til Orlando... Auðvitað kíkti ég í Walmart á meðan ég beið eftir tímanum og svo borðaði ég á Golden Corral. skilaði bílnum. Ég var mætt á völlinn tveim tímum fyrir flug með allt dótið... ég þekkti nokkra í vélinni. flugið var um 7 tímar.

8.nóv 
Bíðarinn sótti mig á völlinn og ég lagði mig í 2 tíma áður en ég fór að vinna.

 

Kefl - London - Lissabon

12.okt
Við vöknuðum um kl 4 am... áttum flug kl 7 til London Heathrow... borðuðum morgunmatinn á betri stofunni. Í London biðum við nokkra klst og flugum með Tap Air til Lissabon. Við tókum leigubíl á "hótelið" okkar sem reyndist vera Air B&B "hellir". Gólfið er örugglega 500 ára... og ekki hægt að ganga um skólaus. Þetta hafa örugglega verið undirgöng milli húsa en breytt í íbúð.

13.okt
Við tókum strætó í expo-ið að sækja númerið. Hittum 3 Íslendinga í sömu erindagjörðum. Við fórum í mollið og keyptum okkur morgunmat fyrir næstu daga og fengum okkur að borða á veitingasvæðinu. 

14.okt
Tókum það rólega... við erum í elsta hluta Lissabon, göturnar steinlagðar og mjög þröngar. Húsin standa þétt og maður er aldrei viss hvort maður sé í blindgötu/blind-brekku. Við skoðuðum 2 kirkjur á röltinu okkar. 

15.okt
Svaf ótrúlega illa og fór á fætur kl 4 til að fara í maraþonið. Það verður heitasti dagurinn í dag af tímanum hér, segir spáin. Allt um maraþonið á hlaupablogginu byltur.blog.is
Í stuttu máli gekk mér ekki vel en ég kláraði. Eftir sturtu og smá hvíld fórum við út að borða.

16.okt
Ég svaf frekar illa, með nábít og jaðraði við sinadrætti í fótum. Þetta er síðasti dagurinn hér svo við ætlum að skoða okkur eitthvað um. 

Eftir hlaupið tók ég það rólega enda búin á því í bili. Fór síðan í sturtu og við löbbuðum í bæinn til að fá okkur að borða. Í dag eru 4 ár síða elsku pabbi kvaddi okkur.

17.okt
Í dag er afmælisdagur yngstu dótturinnar, 32 ára. Við þurfum að ganga frá, pakka og fl í dag. Við reyndum að skoða neðanjarðarborgina en það var lokað, við fórum með strætó í mollið og dingluðum okkur eitthvað. Við fórum síðan snemma að sofa, þurfum að vakna 3:15 því Celso (eigandinn) ætlar að keyra okkur á völlinn kl 4:15.

18.okt
Við eigum flug kl 7 am til London og kl 13:10 heim... lendum í Keflavík um kl 4 eh.

Keflavík - Seattle WA - Pendleton OR - Lewiston ID - Seattle WA - heim

31.ág

     Days Inn, Bellevue, 3241 156th Ave S-East Bellevue WA 98007
     Tel: [phone]    room 214

Þetta er í fyrsta sinn sem við ferðumst með Delta til Ameríku. Það kom ágætlega út. Flugið var kl 8:45 am og þeir buðu upp á morgunmat á leiðinni út. Við millilentum í Minneapolis og héngum þar í nokkra tíma. Þaðan flugum við til Seattle. Tímamismunurinn er 7 klst og við fórum fljótlega að sofa þegar við komum á hótelið í Seattle.

1-4.sept ... 3 nætur

     Knights Inn, 310 S-East Dorion Pendleton OR 97801-2530
     Tel: [phone]  room 121 

Við vöknuðum snemma og vorum lögð af stað kl 8 am enda er þónokkur keyrsla til Pendleton OR. Við fengum okkur að borða í Wildhorse Casino áður er við settum tærnar upp í loft.

2.sept
Við kíktum í búðir, skoðuðum bæinn, ég reyndi að komast í skoðunarferð... The Historic Underground Tour... en það var uppselt. Við fórum á startið fyrir maraþonið á morgun, ég fékk númerið mitt og ég gekk rúma 3 km með Sharon.

3.sept
Klukkan hringdi 2:30. Maraþonið var ræst kl 4 am. (Sjá byltur.blog.is) Eftir maraþonið tókum við það rólega, það er svakaleg hitabylgja hérna.

4-6.sept... 2 nætur

     Days Inn, 3120 N South HWY. Lewiston ID
     Tel: [phone]   room 103

Við erum enn á vitlausum tíma og það tekur ekki að breyta því. Við vöknuðum snemma og vorum lögð af stað til Lewiston Idaho um 8 leytið am. Við komum til Idaho um hádegið. Lewiston og Clarkston (næsti bær) heita eftir landkönnuðunum Lewis og Clark. Við skoðuðum bæinn, versluðum, fengum okkur að borða og komum okkur fyrir á Days Inn Lewiston. Mér fannst voðalega skrýtin lykt í loftinu en áttaði mig ekki á því hvað það var.

5.sept
Við sáum í fréttum að það geysa skógareldar á stórum landsvæðum allt í kring um okkur. Allt sem átti að vera utandyra var fært inn vegna reykjakófs í loftinu... og skyggni er lítið í dag. Nú sé ég eftir að hafa ekki tekið myndir í gær. Við kíktum á hlauparana sem hlupu í WA í dag og ég gekk einn hring. Mistrið er mikið og á að vera eins á morgun. Við keyrðum á startið á morgun til að kíkja á aðstæður. Það var í Hells Gate State Park í Clarkston... uþb 10 km frá hótelinu. 

6.sept.... 1 nótt
Við ákváðum að Lúlli myndi bíða á hótelinu meðan ég færi í maraþonið (sjá byltur.blog.is) ég fékk að tékka mig út um hádegi og náði þess vegna að fara í sturtu áður en við lögðum af stað til Seattle. Við vorum heppin að leiðin okkar var ekki lokuð vegna skógarelda. Við komum um kvöldmat til Seattle... og gistum á Quality Inn

     Quality Inn, 1850 SE Maple Valley HWY, Renton WA 98057
     Tel: [phone]    room 308

7.sept... Delta flug til JFK og þaðan heim.

Keflavik - Minneapolis - N-Dakota - S-Dakota - Minneapolis - heim................ 15-21.júlí 2017

15.júlí
Við byrjuðum á betri stofunni fyrir flugið til Minneapolis. Við flugum í breiðþotu og vélin var nær full. Það voru smá vandræði hjá einum farþega sem þurfti læknishjálp og það voru 3 læknar og ein hjúkrunarkona í vélinni sem aðstoðuðu.

Við höfum aldrei kynnst eins miklum hægagangi í tollinum í USA eins og þarna... það tók okkur 2 klst að komast út að sækja bílinn. Við fengum ágætis bíl og við byrjuðum á Walmart, kaupa vatn og fl.

........... vorum á sömu áttu og í síðustu ferð.
            Super 8 6445 James Circle N, Brooklyn Center MN 55430 
            Tel: [phone]... herb 153 
           
16.júlí
Strax eftir morgunmat keyrðum við sem leið lá norður... til Breckenridge N-Dakota. Bærinn er á fylkjamörkum og þeir sem hlaupa í dag og á morgun þessa sömu leið geta krossað út 2 fylki.
2 mílum frá hótelinu á Welles Park Fairground á startið að vera á morgun. Ég fékk númerið mitt nr 42 enda er þetta maraþon tileinkar 42 ára brúðkaupsafmælinu okkar 17.júlí. Við fórum síðan snemma að sofa - við erum hvort sem er á vitlausum tíma.

........... Knights Inn Wahpeton, 995 21st Ave N-Wahpeton ND 58075
            Tel: [phone]  room 109  

17.júlí
Lúlli keyrði mig í hlaupið (allt um það á byltur.blog.is) tékkaði okkur út og sótti mig síðan. Þaðan héldum við suður til Celtic Park í S-Dakota þar sem næsta hlaup er... það var rúml 3ja tíma keyrsla. Við tékkuðum okkur inn á hótel (sama og í síðustu ferð) og fórum snemma að sofa. Um nóttina varð fárviðri og allt rafmagnslaust í marga klst.

18.júlí
Við vöknuðum í rafmagnsleysi og græjuðum okkur í myrkri fyrir hlaupið. Það voru 20 mílur á startið... svo allt var gert hálftíma fyrr en í gær. Eftir hlaupið fórum við á Royal Forks til að halda upp á brúðkaupsafmælið og 2 maraþon. 

............ Econo Lodge, 5100 N-Cliff Ave
             Tel: [phone],  room 118... nýuppgert og gott hótel.

19.júlí
Það var æðislegt að vera ekki í 3ja maraþoninu í dag. Við sofum auðvitað aldrei út því við erum alltaf á vitlausum tíma. Við fórum af stað fljótlega eftir morgunmat. Keyrðum austur I 90 og ég valdi að fara norður I 35 frekar en sveitaveginn sem Garmin vildi velja. Við stoppuðum nokkrum sinnum á leiðinni til að teygja okkur fórum í Target, Walmart og komum á áttuna í Brooklyn Center rétt eftir hádegið. Herbergið var ekki tilbúið svo við fórum í Costco, Dollar Tree og borðuðum á Golden Corral.

20.júlí
Við höfum þennan dag til að dingla okkur um allt, við verðum að finna eitthvað að gera :)  

21.júlí
Pakkað, tékkað út, dundað sér í búðum, bílnum skilað og að lokum flogið heim... Ferðin búin.

Keflavík - London - París - Keflavik 27.júní - 5. Júlí

27.júní       Smart Camden Inn Hostel, 
              55-57 Bayham Street Camden London,NW1 0AA UK
              Tel: [phone]
Lúlli keyrði okkur Svavar út á flugvöll um hádegið og við fórum beint í betristofuna og fengum okkur að borða. Flugið var kl 16:10 til London. Það var rigning þegar við komum en við létum það ekki á okkur fá... og héldum plani. Við tókum lestina frá Heathrow til Kings Cross brautarstöðvarinnar en ferðin tók 5 korter. Þar uppfylltum við markmið nr 1... en það var að taka myndir af okkur við BRAUTARPALL 9 3/4. Síðan gengum við rúman km á hostelið í smá rigningu og vorum komin þangað um miðnætti. Það var skemmtileg tilviljun að fá herbergi nr 42.

28.júní

Við tókum daginn snemma og gerðum víðreist um borgina, byrjuðum á að læra á lestarkerfið og kaupa okkur oyster. Fyrst fórum við á Trafalgar Square, svo sáum við lífvarðaskiptin við Buckingham Palace, Westminster Abby og Bridge, Big Ben, Nr 10 Downing Street. Við sáum óvænt tímamælingarpunkt Greenwich, fórum að dyrum Sherlock Holmes, 221B Bakerstreet og gengum gangbrautina sem Bítlarir gerðu fræga á Abby Road.

29.júní

Við áttum bókaða 12 tíma rútuferð i dag með Golden Tours, mæting kl 7:45. Við þurftum að læðast út mjög snemma til að ná lest og finna út hvaðan var farið af stað. Eftir það gátum við slakað á... Fyrst var farið að Windsor Castle... með fyrirmæli um að mæta kl 11 í rútuna... en 10 mín fyrir 11 var hliðinu við kastalann lokað vegna lífvarðaskipta... þegar það var opnað aftur hlupum við eins og brjálæðingar að rútunni... og vorum sem betur fer ekki síðust... rútan var farin af stað þegar síðustu komu hlaupandi...

Næst var stoppað í Lacock... og skorið af tímanum vegna tafarinnar hjá Windsor Castle. Við Svavar náðum að taka nokkrar myndir af þessum ævaforna bæ og heimili Harry Potter hjónanna. Ég var svekkt yfir að geta ekki séð safnið þar sem senur úr myndunum voru teknar... Þarna misstu 2 af rútunni... voru skildir eftir.

Þriðja stoppustöðin var í Bath... fallegur bær, eldgamall eins og flest annað hér og þar fengum við Svavar okkur Pizzu og ís... Hér pössuðu sig allir að ná rútunni... og þessir 2 sem misstu af henni síðast komu með annarri rútu frá fyrirtækinu og sameinuðust okkur aftur. Hér myndaði ég blómabók Jane Austin, kirkju staðarins og eitthvað fleira.

Síðasta stoppustöðin var við hið fornfræga Stonehenge... sem er vægast sagt ótrúlegt fyrirbæri. Fyrst fannst mér steinarnir frekar litlir miðað við allar myndirnar sem maður hefur séð en svo sá maður á myndunum hvað fólkið var smátt. Við gátum gengið á göngustíg kringum steinana og sumstaðar vorum við nokkuð nálægt. Við voru um 2 klst að keyra til baka, vorum sett út við einhverja lestarstöð. Við vorum orðin nokkuð þreytt eftir þessa löngu ferð og fórum fljótlega að sofa.

30.júní

Síðasti dagurinn í London... við erum búin að gera heilmikið síðustu 2 daga. Í dag tókum við lestina til Moorgate... og gengum að The Gherkin. Hvað voru bretarnir að hugsa þegar þeir tróðu þessu ferlíki á milli hinna háhýsanna!!! Og rétt hjá var hús sem leit út eins og gufuverksmiðja sem stæði upp á endann !!! Þarna ægði saman öllum byggingarstílum.
Við sáum eitthvað af City of London, London Bridge, Tower Brigde og fengum okkur að borða. Við fórum snemma til baka á hostelið... til að undirbúa brottför snemma í fyrramálið, en við eigum pantaða lestarferð kl 8:30 til Parísar með Eurostar.

1.júlí

Við höfðum reynt að hafa allt tilbúið þannig að við gætum læðst út úr herberginu með allt okkar dót. Við vöknuðum 6:45 og tókum strætó 214 fyrir utan hostelið kl 7:23. Leiðin á brautarstöðina var stutt...
Hvílíkur mannfjöldi var að fara með lestum Eurostar... Þetta var alveg ný reynsla fyrir mig. Lestin fór 8:30 og við höfðum ekki tíma til að fá okkur að borða fyrr en á leiðinni. 
Endastöðin í París er Gare Du Nord... og hótelið okkar var í göngufæri.

     Hotel at Gare Du Nord
     10 Rue Philippe de Girard, 10th arr, Paris
     Tel: [phone]

Við komum í rigningu eins og í London. Við vorum heppin að fá herbergið strax og skelltum okkur með lest til að skoða hinar frægu Catacombs. Það var hætt að rigna en hvílík röð... við stóðum nákvæmlega 3 klst í röðinni áður en við komumst inn. Biðin var vel þess virði - þetta er ólýsanlegt... mannabeinum raðað í mynstur í þessum hvelfingum. Við vorum klst að fara eftir öllum göngunum. Þetta var orðinn langur dagur... en það fyrsta sem ég gerði þegar ég kom á hótelið var að kaupa skip-the-line-priority í Louvre og Eiffel turninn.

2.júlí

Louvre... við sóttum miðana kl 9 á ákveðinn stað. Og fórum fram fyrir alla röðina. Við byrjuðum í listaverkaálmunni... Móna Lísa var á sínum stað. Hvílík stærð á þessu safni og auðvelt að týnast... við sáum bara brot EN ég m.a.fékk ósk mína uppfyllta að sjá egypska múmíu. Louvre var nóg fyrir okkur í dag... margra km ganga á hörðum gólfum.

3.júlí

Í dag áttum við pantað í Eiffel turninn kl 10. Við sóttum miðana og fengum leiðsögumann með okkur sem fór með hópinn fram fyrir allar raðir. Við fórum fyrst upp á "aðra hæð" og svo upp í topp... MAÐUR MINN, hvílíkt útsýni... 
Við tókum lyftuna niður á aðra hæð... og gengum um 150 tröppur niður á "fyrstu hæð" þar sem við gátum meðal annars gengið á glergólfi... Vá, hvað það var erfitt svona hátt uppi að sjá fólkið undir. Þar borðuðum við hádegismat.
Síðan gengum við meðfram Signu niður að litlu frelsisstyttunni sem var þakklætisvottur US til Frakka fyrir stóru frelsisstyttuna. Þaðan tókum við lest til að skoða Sigurbogann. Hann er eitt stórt listaverk. Þetta var orðið gott í dag. Sólin skein glatt í allan dag.

4.júlí

Ég hafði reynt eins og ég gat að fá forgangsmiða í Notre Dame... en þeir voru ekki til. Það er ókeypis í kirkjuna sjálfa en raðirnar geta verið skelfilegar. Hins vegar þarf að borga fyrir að fara upp í turnana og sjá bjöllurnar og útsýnið yfir borgina. Við ákváðum að mæta snemma... vöknuðum fyrir kl 7, borðuðum morgunmat og skelltum okkur strax í lestina. Svavar hefur séð um leiðsögnina á staðina (open streetmap) og við vorum með fyrstu mönnum á staðinn og gengum beint inn í kirkjuna. Síðan náði ég að skrá/panta aðgang að turnunum rúml. 10.
Þetta gat ekki heppnast betur... Þegar við vorum komin upp allar 422 tröppurnar sáum við hvað það var komin löng biðröð til að komast inn í kirkjuna. Notre Dame var eina mannvirkið sem við áttum eftir að skoða... um hádegið var því náð... og við röltum rúma 3 km aftur á hótelið, bara af því að veðrið var svo gott. 
Á hótelinu gerði ég frumstæðan PARÍS... það verður að hoppa einn París í París :)

5.júlí... vakna kl 4:20, leigubíll á völlinn kl 5, flug heim kl 8

Kefl - Boston - Buffalo - Minneapolis - Chamberlain - Rapit City - Sioux Falls - Minneapolis - heim

25.maí...Vá hvað morgunflug er ólíkt léttara þegar maður ætlar að keyra einhverja vegalengd á eftir. Við erum búin að bíða eftir þessari ferð... vetrarstarfinu lauk í gær og fríið byrjar í dag. Vala og Hjöddi eru með okkur. Þau sóttu okkur kl 7:30 og við nutum okkar í betri stofunni fyrir flug... Allt gekk vel... við fengum frábæran bíl og keyrðum af stað til Buffalo... eftir nokkur stopp komum við til Amsterdam um kvöldmatinn en við gistum þar í nótt.

     Super 8, 5502 Route 30, Amsterdam NY 12010
     Tel: [phone]   room 112 

......................................

26.maí... Við vöknuðum snemma, borðuðum morgunmat og keyrðum til Buffalo. Við áttum pantaða og fengum svítu fyrir okkur þar. Þá ákváðum við að fara strax í Niagara fossana. Veðurspáin hafði ekki verið sérstök en það rættist úr veðri. Við keyptum okkur skoðunarpakka, bátsferð og fleira sem tók í allt 4 og hálfan tíma. Tékkuðum okkur inn á svítuna á Super 8.

     Super 8 1288 Sheridan Drive, Kenmore NY 14217 (Buffalo)
     Tel: [phone]   fyrst 201 og svo 107

27.maí... Við vöknuðum snemma... fengum skipt á svítunni og 2 einstaklingsherbergjum niðri... síðan drifum við okkur yfir til Kanada en Niagara fossarnir sjást betur þaðan. Af því að við vorum snemma lentum við ekki í neinum biðröðum við landamærin. Síðan fórum við að sækja númerið fyrir maraþonið á morgun.

28.maí... Buffalo maraþon... umfjöllun verður á byltur.blog.is. Vala og Hjöddi buðu okkur út að borða eftir hlaupið og ég valdi buffetið í Niagara Falls Casino. Frábær endir á góðum degi.

29.maí... Pakkað... og búðarráp fram að flugi, fyrst flug til Chicago og þaðan til Minneapolis. Veðurspáin fyrir dagana í Buffalo var ekki góð en við vorum blessuð með frábæru veðri allan tímann. Við lentum eftir kl 10 um kvöldið í Minneapolis... veðrið var gott og við fengum lúxus van. Sem betur fer var stutt á hótelið... og í svefn.

     LaQuinta Inn, Minneapolis 7815 Nicollet Ave S-Bloomington, MN 55420
     Tel: [phone] room 1010

30.maí... Eftir morgunmat var lagt af stað... stoppað nokkrum sinnum á leiðinni... þar á meðal við nýja minnismerkið af indiánakonunni við Chamberlain þar sem við gistum í nótt.

     Super 8 Box 36, Chamberlain 57325
     Tel: [phone] room 114

31.maí... Þetta er allt að gerast...Stoppuðum í 1880 Town til að teygja úr okkur á leiðinni til Rapit City.  Eftir að hafa tékkað sig inn hótelið, keyrðum við að Mount Rushmore. Veðrið hefur verið dásamlegt... í kringum 25-30c... Forsetarnir voru þarna ennþá... við Lúlli erum hérna í 3ja sinn. Mikil upplifun fyrir Völu og Hjödda. Keyrðum í gegnum gamla bæinn og upp að Crazy Horse. - smá shopping spree -

     The Foothills Inn, 1625 LaCrosse St. Rapit City, SD 57701
     Tel: [phone]   room 236  

1.júní... Dagarnir eru alltaf teknir snemma hjá þessum fararstjóra... Eftir morgunmat keyrðum við til Belle Fourche og við stóðum á landfræðilegri miðju Bandaríkjanna. Skoðuðum skemmtilegt safn inni þar sem Hjöddi fann ævaforna prentvél... gaman fyrir prentarann :) 
Þaðan keyrðum við gegnum Ponderosa gamlan kúrekabæ á leiðinni til Devils Tower... Því fyrirbæri er erfitt að lýsa... himinnhár stuðlabergs-turn... ummálið neðst er 1,6 km, hæðin frá rótum er um 300 metrar þverhnípt en hann stendur í um 1700m hæð. Ég er búin að bíða lengi eftir að sjá þetta undur. Devils Tower var fyrsta "Monument" USA.
Á leiðinni til baka keyrðum við niður Spearfish Canyon. Fallegt og friðsælt gil.

2.júní... Í dag lögðum við af stað áleiðis til Minneapolis. Á leiðinni keyrðum við í gegnum undraveröldina Badland þar sem fjöllin eru röndótt og landslagið er engu líkt. Þegar við áttum eftir uþb 45 mílur til Sioux Falls sprakk dekkið bílstjóramegin að framan... Ég var á krúser á 80 mílum sem er 130 km hraði og með trailer að taka fram úr mér vinstra megin... Mér tókst að stoppa farsællega í kantinum... Dekkið var í tætlum en felgan heil. Lúlli og Hjöddi fundu varadekkið og skiptu um. Við keyrðum síðan á 50 mph til Sioux Falls á kleinuhring. Blessuð að vera heil á húfi. Við keyptum síðan nýtt dekk í Walmart og versluðum á meðan það var sett undir.

     Econo Lodge Sioux Falls, 5100N Cliff Ave Sioux Falls SD 57104
     Tel: [phone] room 514

3.júní... síðasti leggurinn keyrður til Minneapolis og BEINT í Mall of America. Þar var verslað, borðað og skoðað fiskabúrið á neðstu hæð.

     Super 8  6445 James Circle, Brooklyn Center/MPLS, MN 55430
     Tel: [phone] room 154

4.júní... Nú skal versla ALLAN daginn...enda höfum við ekkert annað að gera ;) Við gerðum víðreist út um allt og fórum meira að segja í Costco. Hitinn hefur verið um 90F eða vel yfir 30 stig í dag. Dásamlegt.

5.júní... Heimferð í dag... pakkað, kíkt í búðir og bílnum skilað og hangið aðeins á flugvellinum...     

6.júní... lent heilu og höldnu í Keflavík um 6am... Frábærri ferð lokið.

Kef - Denver - Nashville TN

27.apríl
Jæja...enn einu sinni farin út að hlaupa. Ég er ein í þetta sinn enda er þetta bara helgarferð. Það eina sem hefur verið smá áhyggjuefni er hálsbólgan, kvefið og magakveisan sem ég hef verið með undanfarið. Ég hljóp ekki í viku vegna þessa. En nú er komið að því.

Flugið til Denver tók 7:50 og komið fram yfir miðnætti heima þegar ég var komin á hótelið. Ég fór fljótlega að sofa því ég átti flug með South-West kl 6:30 am. Fyrir smá mistök lét ég klukkuna vekja mig kl 3 am - ég var búin að panta skuttluna kl 4:30... en svo komst ég með skuttlunni kl 4 svo þetta var allt í lagi. 
Ég var á sama hóteli og við Lúlli vorum veðurteppt á í fyrra. 

Days Inn Airport
7030 Tower Rd, Denver CO
Tel: [phone] room 202

28.apríl
Flugið til Nashville tók rúma 2 tíma og klukkan færðist fram um 1 tíma. Ég fékk bílinn og fór á hótelið... en fæ ekki herbergið fyrr en kl 3. Ég sótti gögnin, keypti mér morgunmat og vatn og fékk mér að borða... Fékk herbergið og tók til hlaupadótið fyrir morgundaginn.

29.apríl
Dagurinn byrjaði mjög snemma með maraþoni... allt um það á byltur.blog.is
Eftir sturtu og símtal við Bíðara nr 1 fór ég út að borða og í nokkrar búðir... og svo tók ég það rólega.

30.apríl
Það var gott að geta sofið út en samt vaknaði ég snemma... fór í morgunmat, skipulagði daginn og lagði af stað. Fyrst var Target, Walmart, Lowes og svo Golden Corral. Það var búið að vera heitt og rakt úti en meðan ég var að borða breyttist verðrið í TROPICAL STORM eins og fólkið sagði sem leit út um gluggana. Breytingin var þannig að ég tók videó og setti á facebook. Þegar ég kom aftur á hótelið pakkaði ég því mesta, stærstu pökkunum, talaði við Bíðarann... hann er alltaf í beinu sambandi og horfði á eina bíómynd. 

1.maí
Ég frétti að það væri hefðbundið skrúðgöngu-slagveður heima... en frábært veður hér. Ég fór í morgunmat, skilaði bílnum og tékkaði mig inn. Ég gat ekki tékkað töskurnar inn alla leið, þannig að í Denver, lenti ég í Terminal C og þurfti að taka lestina í tösku-komudeild, taka töskurnar, tékka mig inn aftur, fara í gegnum eftirlitið og lestina til baka í B (United Lounge) og svo er Icelandair í Terminal A. Ég á flug heim kl 17:20

Days Inn Airport Nashville
821 Murfreesboro Pike Nashville 37217
Tel: [phone]  room 641

Keflavík - London - Róm

31.mars...

Evrópuflug er alltaf morgunflug... við áttum flug til London kl 7:40... vöknuðum kl 4am. Við flugum í breiðþotu til London og þurftum að skipta um terminal, fara úr 2 í 4 og það krefst amk auka hálftíma í stoppi. Okkur finnst Heathrow leiðinlegur tengiflugvöllur. Við komumst í gegnum eftirlitið í terminal 4 án þess að hafa farmiða... en gátum síðan ekki keypt vatnsflösku án farmiða. Farmiðann gátum við ekki prentað út fyrr en 2 tímum fyrir brottför. Við flugum svo með Alitalia til Rómar. Ég var búin að panta leigubíl sem beið við útganginn. Við vorum hundþreytt þegar við komum á hótelið og fórum fljótlega að sofa. Við getum ekki hafa verið heppnari með staðsetninguna á hótelinu. 

1.apríl

Við vöknuðum snemma... raunar var lítið sofið, því það virðist sem vinsælasti partýstaðurinn sé á torginu fyrir neðan gluggann hjá okkur. Við fengum okkur morgunmat... Við gistum í nunnuklaustri!!!  og dagurinn var notaður til læra á lestarkerfið og sækja gögnin fyrir maraþonið. Það gekk bara vel þó gangurinn væri langur, bæði í expo-inu og að því frá lestinni. Lestarstöðin okkar er við Colesseo þ.e. hið heimsfræga hringleikahús. Við létum okkur nægja að skoða það að utan í dag... hvíla fæturna aðeins fyrir hlaupið á morgun. Veðrið var dásamlegt. Fórum snemma að sofa en það var kátt fyrir utan gluggann á laugardagskvöldi og illa sofið.

2.apríl

Við erum svo heppin að hótelið hafði morgunmatinn klst fyrr í dag vegna maraþonsins. Eftir að hafa borðað og græjað sig, gengum við á startið. Allt um hlaupið á byltur.blog.is
Eftir hlaupið labbaði ég á hótelið, Lúlli mátti ekki bíða við markið og það rigndi svo mikið að hann fór á hótelið. Ég fór í sturtu... þá var stytt upp og við gengum niður að hringleikahúsinu og skoðuðum það að innan. Hvílíkt mannvirki.

3.apríl

Við ákváðum að nota daginn í að skoða Vatikanið og Péturskirkjuna. Nú erum við eins og innfæddir í lestunum. Í hverju skrefi er kirkja eða rústir.

RÓM ER Í RÚST

Alls staðar voru kílómetra langar raðir en við komumst fram fyrir þær út á ART-kort sem fylgdi maraþoninu. Fengum að skipta um herbergi... sem snýr út að lokuðum garði bakvið.

4.apríl

Leigubílstjórinn sem keyrði okkur á hótelið frá flugvellinum sagði okkur að það væru 700 kirkju í Róm. Við skoðuðum nokkrar í dag... þær voru allar í næsta nágrenni... Hvílík listaverk, hátt til lofts og vítt til veggja.

5.apríl

Við ákváðum að taka lestina til Pisa og skoða skakka turninn. Það voru 4 tímar hvora leið og strætó á staðnum. En í staðinn sáum við landið og gátum hvílt fæturna... Lúlli var orðinn mjög þreyttur af göngu. Komum seint heim.

6.apríl

Eg vildi hvíla fætur Lúlla BETUR ;) og taka lestina til Pompeii en hann vildi það ekki. Við skoðuðum Santi Páls kirkjuna og sátum aðeins úti á Piazza Del Popolo... það sem ég meðal annars réðist inngöngu til að skoða lögreglustöð, en fékk ekki... hvernig á maður að vita hvað er safn og hvað ekki... dyrnar voru opnar :) á torginu hittum við fyrir tilviljun íslensk hjón...
Við eigum 693 kirkjur eftir :O

7.apríl

Heimferð í dag. Við skráðum okkur út af hótelinu um kl 9 og drógum töskurnar á eftir okkur í lestina... lest frá Colosseo til Termini og þar tókum við Leonardo Express út á flugvöll.
Við áttum flug kl 14:15 með Alitalia til London og með Icelandair heim kl 21.10.

Casa Santa Sofia,
Piazza Della Madonna Dei Monto 3, Monti Roma 00184...
tel [phone], room 203 og svo 313

Kefl - Boston - Little Rock AR :)

2.mars... Mér finnst ótrúlega langt síðan ég var úti síðast en það var nú samt í janúar. Ég lenti í Boston, gisti eina nótt og á flug kl 7 am til Little Rock með millilendingu í Chicago.

Comfort Inn
900 Morrissey Blvd Boston MA 02122
Tel: [phone]  room 524

3.mars... Lúlli var búinn að hringja á undan vekjaranum, ss fyrir 4 am. Ég átti pantaða skuttluna út á völl kl 5 því ég átti flug með American Airlines kl 7 til Chicago og þaðan til Little Rock. Ég var svo búin að fá bílinn á áfangastað, Crysler lúxuskerru rétt um hádegið. Ég ákvað að taka búðarrápið, Target, Walmart, Dollar Tree, sækja gögnin og borða á Golden Corral, áður en ég tékkaði mig inn á sexuna.

Motel 6, 400 West 29th street N-Little Rock
Tel: [phone]  room 112

4.mars... Ég svaf ekkert voðalega vel... mikið af lestarflauti yfir nóttina. Ég hafði stillt vekjarann á 4 am... því ég ætla að hlaupa 5km kl 7:30
Ég var mætt á bílastæðið 2 klst fyrir hlaup og allt gekk eftir áætlun. Fyrst var frekar kalt og ég var allan tímann í jakkanum en svo hlýnaði vel. Ég fékk mér morgunmat á Golden Corral og fór í nokkrar búðir... og skipti um hótel... ég var hér fyrir 3 árum.

Days Inn, 3200 Bankhead Drive, Little Rock, AR 72206
Tel: [phone] room 133

5.mars... klukkan var stillt á 3:30 fyrir maraþonið... nánar um það á byltur.blog.is 

eftir maraþonið tók ég það rólega, nennti ekki út og horfði á Star wars mynd. Ég ákvað að keyra til Memphis daginn eftir (6.mars) og heimsækja Graceland rokkkóngsins Elvis Presleys... þá var líka tími til að versla...því ég flýg ekki heim fyrr en á þriðjudag. 

7.mars... heimferð, flug fyrst til Chicago, þaðan til Boston og heim.

Maui og Kaua´i Hawaii 12-22.jan 2017

12.jan SEATTLE 
Já góðan daginn, ég var ekki búin að taka alveg úr töskunum eftir síðustu ferð þegar við erum farin aftur. Í þetta sinn verður þetta meira en helgarferð... (eins og síðast þegar ég fór til Hawaii) því nú við ætlum að heimsækja tvær eyjar sem við höfum ekki farið til áður.

Við áttum flug til Seattle kl 5 eh og flugið var tæpir 8 tímar... svo við ákváðum að gista þarr. Það var kuldalegt úti en snjólaust. Við vorum orðin þreytt þegar við komum á hótelið og eftir að hafa opnað tölvuna og hringt í Jonnu, vorum við fljót að sofna.

Days Inn Sea Tec,
19015 International BLVD. 98188 Seattle WA,
Tel: [phone] room 330
.........................................................

13-16.jan MAUI
Við vöknuðum auðvitað um miðja nótt (8 tíma munur) svo við mættum í morgunmat um leið og opnaði kl 6am.
Við áttum flug með Delta um hádegið til Maui Hawaii. Þegar við komum út á flugvöll var flugið YFIR-YFIR bókað og við samþykktum að færa okkur í annað flug... það var með Alaska Airlines og millilendingu í Portland OR. 
Ferðinni seinkaði þá aðeins hjá okkur en flugið til Portland var 30 mín og flugið til Maui var 5:45... Við lentum rúmlega 10pm, fengum bílinn og keyrðum yfir eyjuna á hótelið okkar. Hótelið var ágætlega staðsett fyrir maraþonið, allt í göngufæri.

Aina Nalu Lahaina Resorts, 
660 Wainee Street Lahaina HI 96761, 
Tel: [phone]
..........................................................

16-22.jan Kauai Hawaii

Flugið til Kaua´i tók um 45 mín. Við fengum ágætan bíl hjá Hertz og renndum í Walmart og svo á hótelið okkar... Allt sem innfæddir sjá um og eiga virðist eiga það sameiginlegt að líta út fyrir að vera í niðurníðslu... það þarf nefnilega að hafa fyrir snyrtilegu umhverfi á hitasvæðum. 
ATH.... verð að leiðrétta þetta... Það er VETUR og þess vegna er gróðurinn svolítið rytjulegur, sumar jurtir eru fölnaðar, í dvala, þó aðrar séu blómstrandi.
Við tékkuðum okkur inn og tókum því rólega. Hér eru hænur með unga og hanar hlaupandi um villt um allar trissur, á planinu hjá Walmart, við Burger King og við hótelið og hópurinn hleypur á eftir manni.
17.jan... Allar eyjar Hawaii eru með há fjöll, regnskóga og mikið regn á norðurhliðinni. Veðurspáin breytti sér, var okkur hliðholl, svo við keyrðum norður þar til vegurinn endaði - notuðum góða veðrið. Landslagið er ótrúlega fallegt, stendurnar himneskar, skoðuðum tvo hella.
18.jan... Við fréttum af tveim fossum rétt við bæinn svo við fórum að skoða þá, svo sóttum við númerið fyrir maraþonin í Smith Family Garden Luau en þar vorum við búin að panta okkur dinner og show um kvöldið.
19.jan... Aloha Series #1 Marathon... ræst kl 4:30 í Smith Family Garden. Rosalega fallegur og vel hirtur garður. Maraþonið er á byltur.blog.is
20.jan... Vá hvað það var gott að sofa... ég var furðu góð eftir hlaupið. Við keyrðum suðurhliðina á eyjunni og keyrðum eftir gilbrún "Grand Canyon" eyjunnar, hrikalegt landslag með himinháum fossum. Fossarnir á eyjunni eiga það sammerkt að vera mjög ó-aðgengilegir... svo þeir sjást bara úr fjarlægt nema maður kaupi sér þyrluferð.
21.jan... Aloha Series #3 Marathon... ræst kl 4:30 á ströndinni í Kapaa í grenjandi rigningu og hávaða roki (bara eins og heima). Marathonið á byltur.blog.is

Kauai Palms Hotel
2931 Kalena Street Lihue 96766 HI US
Tel: [phone]  room 17 á 2.hæð... ekki sími í herberginu !!!

22.jan... Komið að heimferð, flug til Seattle kl 14:20.Flugið var 5 og hálfur tími og svo fórum við 2 tíma aftur á bak þannig að klukkan var að verða 11pm. Ég hringdi á skutluna.
23.jan... Flug heim kl 15:30

QUALITY INN SEA-TAC AIRPORT

2900 S. 192nd Street, Seattle, WA, 98188, US

Phone: [phone]

Gleðilegt ár 2017

GLEÐILEGT ÁR 2017

ÉG ÓSKA ÖLLUM GÆFU OG GUÐS BLESSUNAR Á KOMANDI ÁRI.
TAKK FYRIR LIÐNU ÁRIN

Hlaupa annállinn er kominn á http://byltur.blog.is/blog/byltur/

Afmælisbarn dagsins er Emilía Líf, nú er hún orðin 5 ára, stóra langömmu stelpan mín. Þau halda sennilega upp á afmælið í dag heima hjá sér í Noregi. Við sendum kveðjur frá Texas annað árið í röð.

FJÖLSKYLDAN 

Það fjölgaði um einn í lok mars... og ég vil taka það strax fram að ég var á landinu... nýlent frá USA... þegar Lovísa og Gunnar eignuðust strák sem fékk síðan nafnið Mikael Frosti. Þá eru barnabörnin orðin átta. Við erum blessuð :)

STÓRAFMÆLI ÁRSINS

Öll ár eru viðburðarrík, við hjónin áttum bæði stórafmæli á þessu ári. Lúlli varð 70 ára í júlí og ég 60 ára í nóvember. Ótrúlegt en satt - eða er þetta samsæri... setti einhver vitlaus ártöl á dagatölin okkar.

FERÐALÖG

Við þreytumst ekki að ferðast, amk ekki ég. Ég fór 7 ferðir til USA og tvær ferðir til Evrópu, fyrst til Noregs og svo til Grikklands. Kannski er þetta upphafið af EXPLORING EUROPE... hver veit :) Nú hef ég klárað annan maraþon hring um USA... og er komin yfir 200 maraþon.

HREYFING

Ég hljóp 10 heil maraþon á árinu og eitt hálft... Við systur og Svavar tókum ratleikinn eins og undanfarin sumur, ýmist að hluta til eða allan... Við Vala fórum ÓTAL ferðir á Helgafellið okkar og ég gekk Prestastíginn með góðum hópi... EN... toppur alls var gönguferðin niður í Grand Canyon. Ég hafði beðið í heilt ár eftir þessari göngu sem tókst frábærlega vel og var ótrúleg upplifun. 
https://www.youtube.com/watch?v=Br8STgrH4LY

Ég er enn að glíma við meiðsli í hægra fæti. Það veldur því að ég þori ekki að æfa of mikið... en það hefur auðvitað þau áhrif að maraþonin taka sífellt lengri tíma hjá mér... EN ÉG HEF ALLTAF JAFN GAMAN AÐ ÞESSU OG ELSKA AÐ FERÐAST.

Þetta ár verður spennandi... meiri ævintýri :)

PS.

Ég braut blað er ég sótti um prestsembætti í fyrsta sinn... en það er í Hjallakirkju í Kópavogi... spennandi að vita hvað það leiðir af sér.