Bryndís Líf á afmæli í dag :)

 Innilegar hamingjuóskir...

Elsta barnabarnið og nafna mín, Bryndís Líf á afmæli í dag, 29 nóv. orðin 15 ára.
Vá... hvað árin hlaupa, maður minn (hjá mér) hún er ábyggilega búin að bíða lengi eftir þessu...

Við afi sendum  kveðjur frá Seattle til þín, Bryndís Líf og óskum þér alls hins besta í framtíðinni.

Komin til Seattle..

Við áttum flug frekar seint í gær frá Boston, millilentum í New York... þar var 2ja tíma bið og síðan 6 tíma flug til Seattle. Það er ekki spurning jetBlue er besta flugfélagið.

Við komum um miðnætti... og enn seinna á hótelið... var alltof þreytt til að blogga ferðalaginu. Veðrið hér er mjög ,,íslenskt" rigning og hráslagalegt. Það er annað sem er líka mjög ,,íslenskt".... það er gatnakerfið... ég er í vandræðum og er með garminn. 
Nú erum við búin að kíkja í bæinn og erum að fara á Buffet að borða...
Thanksgiving-útsölurnar máluðu borgina rauða í dag... kaninn verslaði brjálað en okkur finnst Seattle vera rándýr borg.

Á meðan við verðum hér gistum við á Econo Lodge North (WA162) 14817 Aurora Avenue North , Seattle, WA, US, 98133
Phone: [phone]... Room 227

Að vaða útí - varðar traust...

Jós.3:13 Og þegar prestarnir, sem bera sáttmálsörk Drottins, hans sem er Drottinn allrar veraldar, stíga fæti í vatn Jórdanar, þá mun vatnið í Jórdan stöðvast, vatnið, sem ofan að kemur, og standa sem veggur. Allt var sem Drottinn sagði.

Jós 3:15 Og er þeir, sem örkina báru, komu að Jórdan, og prestarnir, sem báru örkina, drápu fótum sínum í vatnsbrúnina  en Jórdan flóði yfir alla bakka allan kornskurðartímann ,-16- þá stóð vatnið kyrrt, það er ofan að kom, og hófst upp sem veggur mjög langt burtu, við Adam, borgina, sem liggur hjá Sartan. En það sem rann niður til vatnsins á sléttlendinu, Saltasjós, rann allt til þurrðar. Og lýðurinn fór yfir um, gegnt Jeríkó.-17- En prestarnir, sem báru sáttmálsörk Drottins, stóðu kyrrir á þurru mitt í Jórdan, meðan allur Ísrael fór yfir um á þurru, þar til er allt fólkið var komið yfir um Jórdan.

Þeir sem báru örkina voru 2 þús álnum á undan og í orðskýringum aftast (Biblían 1981) undir mál og vog, segir að alin hafi verið 50 cm. eða hálfur metri, þannig að þeir sem báru örkina voru 1 km. á undan. Síðan hefur það aldeilis tekið tímana tvo fyrir allt þetta fólk að komast yfir ána með allt sitt hafurtask. Á meðan, hófst vatnið upp eins og veggur fyrir ofan þá.  Vatnsmagnið hefur verið gífurlegt því Jórdan var svo vatnsmikil að hún flóði yfir alla bakka.
 
Það stendur í 16 versi að veggurinn hófst upp við borgina Adam, sem liggur hjá Sartan, sem staðarnöfn korta (aftast í Biblíunni 1981) segja að heiti nú Saretan. Og ef við flettum upp í kortunum aftast í Biblíunni, skoðum kort 4, reitur A2 sjáum við Saretan og Jerikó fyrir neðan.  Neðst á kortinu sjáum við mælistiku... sem segir okkur að það eru á milli 40-50 km í loftlínu á milli þessara staða, og engin á er þráðbein, þannig að það er enginn smá spotti sem vatnsveggurinn hefur hlaðist upp á.    

Guði er ekkert ómögulegt... en málið er að það hefði ekkert gerst ef þeir hefðu ekki vaðið útí.  Ef þeir hefðu ætlað að bíða við árbakkann eftir að áin þornaði, hefðu þeir aldrei komist yfir. Þetta varðar traust, þeir óðu útí VEGNA ÞESS að þeir treystu Guði. Fyrsta skrefið var traustsyfirlýsing... það var sama og að segja: við trúum því Guð, að þú stoppir ána ef við göngum útí.

Við verðum oft að treysta og nú aldrei meiri nauðsyn fyrir okkur að treysta þess að við séum leidd og blessuð.

Komin til Boston

Það er nýbreyttni hjá Icelandair að farþegar þurfa að borga fyrir heyrnartól og mat.  Ég sem á fullt af gömlum heyrnartólum - gleymdi þeim. Nú þarf ekki lengur að borga fyrir bíómyndirnar... ég horfði á 2 á leiðinni út.
Við vorum bara með nesti, langlokur úr Bónus og sáum ekki eftir því... þeir sem keyptu sér í flugvélinni fengu alveg eins langlokur og við - þeir borguðu bara meira.

Á morgun eigum við flug til Seattle.

Ótrúlega krúttlegt

Barn snýr sér að Guði og segir: Mér er sagt að ég verði sendur á jörðina á morgun., hvernig get ég lifað eins lítill og ósjálfbjarga og ég er?
Guð segir: Ég hef valið engil fyrir þig úr hópi engla og hann bíður eftir þér, þessi engill mun sjá um þig.
En segðu mér Guð, segir barnið... hérna á himninum geri ég ekkert annað en að syngja og brosa og það er nóg til að vera hamingjusamur.
Og Guð segir: Engillinn þinn kemur til með að syngja fyrir þig, hann brosir til þín alla daga og þú verður umlukinn ást og þannig verður þú hamingjusamur.

Barnið spyr: En hvernig get ég skilið tungumálið sem mennirnir tala?
Guð svarar: Engillinn þinn segir falleg orð við þig, fallegustu orð sem þú hefur nokkurn tíma heyrt og með mikilli þolinmæði og kærleik mun hann kenna þér að tala.
Barnið spyr: Hvað geri ég ef ég vil tala við þig?
Guð segir: Engillinn þinn mun setja saman hendur þínar og kenna þér að biðja.

Barnið segir: Ég hef heyrt að á jörðinni séu til vondir menn, hvernig get ég varið mig?
Og Guð segir: Engillinn þinn mun verja þig þó það kosti hann lífið.
Barnið segir: En ég verð alltaf sorgmæddur, því ég sé þig ekki oftar.
Guð segir: Engillinn þinn á eftir að segja þér frá mér og vísa þér veginn í áttina til mín, en þó mun ég alltaf vera við hlið þér.

Á þessu andartaki færðist ró yfir himininn, guðdómlegar raddir heyrðust og barnið sagði: Kæri Herra, þar sem ég er að fara, segðu mér... hvað heitir engillinn minn?

Og Guð svaraði: Nafn hans skiptir ekki máli, þú kallar hann bara ,,mömmu"

Til Hamingju

Næsta útrás verður í kvikmyndaleik... Íþróttaálfurinn kominn í kvikmyndir og Glanni glæpur kominn á svið... þetta er allt í áttina

Stefán Karl vekur athygli

2,3% af þjóðinni mættu, Katrín!

Í ræðum sumra, sem segjast mótmæla friðsamlega á Austurvelli, er að finna vissan æsingatón og þeir eru farnir að gefa yfirlýsingar eins og þeir hafi umboð þjóðarinnar.
2,3% þjóðarinnar mættu og menn tala eins og meirihluti þjóðarinnar sé sammála þeirra orðum og aðgerðum.  Við höfum öll skoðanir á málunum.
97,7% þjóðarinnar mætir ekki á Austurvöll, margir þeirra geta samt sem áður verið sammála einhverju sem þar fer fram - aðrir eru ósammála...  við viljum öll að það sé tekið á málunum með festu en líka með öryggi...
Flas er ekki til fagnaðar.

Íslendingar láti ekki kúga sig

Þeir kenna okkur ábyggilega um það...

Ef Bretinn lendir í sömu aðstæðum og við, eru þeir í verri málum en við... þeir eru 50 árum á eftir í öllu og hinn breski almenningur er í raun bláfátækur pöbbari.  Ég finn sárlega til með þeim... maður á víst að elska óvini sína...

Bretland sömu leið og Ísland?

Athyglissýki fárra einstaklinga?

Myndi þetta fólk mæta ef fréttamenn færðu ekki fréttir af þessum óeirðamótmælum? Er þetta ekki að nokkru leyti athyglissýki. Vissulega hefur fólk leyfi til að mótmæla... en hvað á maður að kalla þetta þegar fólk fer með sömu ræðuna laugardag eftir laugardag.

það var talið að 7þús. manns hafi mætt... pælið í því, þetta eru 2,3% af þjóðinni... en þetta fólk telur sig tala fyrir meirihluta þjóðarinnar og segir stjórnmálamennina hafa misst umboð sitt, sem þó voru kosnir til að sinna þessu starfi... en hefur þetta fólk eitthvað umboð? Ég bara spyr...

Fanganum sleppt

Klókir eða hvað?

Fyrsta tölvan mín var Macintosh... frábær tölva með allt kerfið á íslensku en vegna þess hve hún var dýr, keypti fólk sér frekar PC... sem stendur fyrir ,,personal computer"
Makkinn hafði svo margt fram yfir PC að ég dauðsá alltaf eftir að hafa skipt yfir... en þegar maður þarf að skiptast á skjölum við fólk þá verður maður að láta sig hafa ýmislegt.

Vandamálin við PC komu fljótt í ljós...Í fyrsta lagi stóð heimurinn á öndinni fyrir aldamótin þegar ráðamenn voru dauðhræddir að kerfið myndi hrynja... og svo eru það þessir endalausu vírusar hjá PC, sem Macintosh-eigendur þurfa ekki að hafa áhyggjur af...
Nú hafa vinsældir Macintosh aukist til muna og mörg ár síðan ég hef séð PC-fartölvu í bíómynd... Eplið er mætt á svæðið og ætlar sér stærri hlut á markaðnum. Besta útspilið hjá PC er því að gefa viðskiptavinunum vírusvörn til að missa þá ekki yfir til Macintosh.

Ókeypis vírusvörn fyrir allar PC tölvur

Að vaða útí...

Því miður eru margir peningalitlir og þurfa að velta hverri einustu krónu mörgum sinnum áður en þeir láta hana fara.  Fyrir þá, eins og fátæku ekkjuna í Mark 12:43 er t.d. erfitt að gefa.  En EKKI EINBLÍNA Á ÞAÐ að hún var fátæk og gaf það sem hún átti. 

Guð þekkir aðstæður hvers og eins og við megum ekki gleyma því að hann hefur vald til breyta aðstæðum okkar.

Hversu oft hefur hann ekki breytt aðstæðum fólks í ritningunni og utan ritningarinnar.  Hann gerði Davíð að konungi og tók konungdóminn af Nebúkadnesar. Drottinn gefur og Drottinn tekur.  Ef hann sýnir okkur svona dæmi í biblíunni, er það öruggt um að hann getur líka breytt aðstæðum hjá öðrum... hann getur breytt okkar aðstæðum.
Við þurfum að treysta honum og treysta á hann.  En það þýðir ekkert að sitja og bíða eftir kraftaverkinu, það gerist ekkert nema við stígum fyrsta skrefið. Það er að segja, við verðum að vaða útí... eins og menn Jósúa gerðu þegar þeir fóru yfir ána Jórdan (Jós 3:11-17).

Máltækið segir Guð hjálpar þeim sem hjálpa sér sjálfir.  Einu sinni fannst mér þetta orðatiltæki það vitlausasta sem ég hafði heyrt... hvað þurfti maður sem hjálpaði sér sjálfur, á hjálp Guðs að halda.

En við verðum að vera tilbúin að leggja eitthvað á okkur sjálf og um leið og við vinnum sjálf að lausn mála - blessar Guð framkvæmdina. 

Saumakonan

Dag einn, þegar saumakonan sat og vann á árbakkanum, þá missti hún fingurbjörgina sína útí ána. Hún hrópaði upp yfir sig í örvæntingu og henni til mikillar undurnar birtist Drottinn sjálfur og spurði: Hvers vegna grætur þú ?
Saumakonan svaraði að fingurbjörgin hennar hefði fallið í vatnið og hún þyrfti á fingurbjörginni að halda svo hún gæti aðstoðað bónda sinn við að afla tekna til heimilisins.

Drottinn hvarf ofan í vatnið og kom til baka með gullfingurbjörg. "Er þetta fingurbjörgin þín?" spurði Drottinn. Saumakonan svaraði neitandi og þá hvarf Drottinn aftur í vatnið og kom upp með demantsfingurbjörg. "Er þetta fingurbjörgin þín?" spurði Drottinn en saumkonan neitaði því. Enn hvarf Drottinn ofan í vatnið og kom nú upp með silfurfingurbjörg og spurði hvort þetta væri sú rétta og saumakonan jánkaði því. Drottinn var mjög ánægður með sannsögli konunnar og færði hennir allar fingurbjargirnar þrjár til eignar að launum, og saumakonan hélt glöð heim á leið.

Nokkru síðar þegar saumakonan var á göngu eftir árbakkanum með eiginmanni sínum, datt hann í ána.
Þegar hún hrópaði upp yfir sig í örvæntingu, birtist Drottinn enn á ný og spurði hvers vegna hún gréti?
"Æi Guð, maðurinn minn datt í ána". Guð stakk sér í ána og kom til baka með Mel Gibson. "Er þetta eiginmaður þinn?" spurði hann. "Já" hrópaði saumakonan.
Drottinn reiddist. "Þú lýgur" sagði hann. "Æ, fyrirgefðu Drottinn, þetta á sér sínar skýringar. Sjáðu til, ef ég hefði sagt ,,nei" við Mel Gibsons, hefðir þú næst komið með Tom Cruise og ef ég hefði sagt ,,nei" við honum, þá hefir þú komið með eiginmann minn. Ef ég hefði sagt ,,já" við honum þá hefðir þú gefið mér þá alla þrjá og þar sem ég er ekki lengur eins hress og ég var þegar ég var yngri hefði ég aldrei getað sinnt þeim öllum þremur.

Þess vegna sagði ég ,,já" við Mel Gibson.

Mórall sögunnar: Þegar konur ljúga, er það af heiðvirðum ástæðum og öðrum til heilla.

Kata vinkona í öskuregni

Mér brá heldur í brún, þegar ég sá þessa frétt... var ekki búin að kíkja almennilega á kortið til að athuga hvort Kata væri í hættu.  Vindurinn er nú versti óvinurinn.
Nú erum við hjónin að fara bæði til LA og til að hitta vini okkar í Santa Barbara... sem hafa sem betur fer ekki þurft að flýja heimili sitt og við biðjum þess að baráttuliðið nái að slökkva eldana hið fyrsta. 
Skógareldar á þessum svæðum eru farnir að herja ansi oft á fólk í Californíu... eins og jarðskjálftahættan sem vofir sífellt yfir þeim sé ekki nóg.

Þeir sem telja sig hafa vit á þessu segja að skógareldar séu hluti af viðhaldi í náttúruferlinu og maðurinn auki aðeins á eldsmatinn í skógarbotninum með því að slökkva eldana of snemma.
Við sem erum alltaf í heimsókn þarna... erum ekki hissa að húsin í jaðri bæjarins brenni, því skógurinn umkringir þau...
Við vonum að bæjarstæðið í Santa Barbara sem er með því fallegasta sem til er, fái að vera það áfram.

Íslensk kona í öskuregni skógarelda

Auðlegð hjartans...

Hvað er raunveruleg auðlegð og hvað gerir mann ríkan. Við lifum ekki án peninga. Það snýst allt um peninga. Frá upphafi hafa menn stundað vöruskipti og selt sína vinnu. Kóngurinn eða keisarinn þarf alsstaðar skattpeninga. 

Allir þurfa að há þessa baráttu að komast af, borga það sem þeim ber og geta keypt það sem þarf.  Gæðum heimsins hafa aldrei verið réttlátlega skipt, alltaf verða einhverjir undir. Það hefur alltaf verið og verður bil á milli ríkra og fátækra á meðan við búum á þessari jörðu. Fólk finnur til með fátækum en á almennt ekki sömu samúð með ríkum. Þó hafa báðir sál. Hver getur dæmt um það hvorum líði betur nema alvitur Guð. 

Við þyrftum kanski að hafa meiri samúð með ríkum, þeir geta aldrei verið vissir um hver er raunverulegur vinur, kanski fylgir þeirra lífi meiri óvissa, meiri óhamingja og skortur á því sem er ekki hægt að kaupa, ást.  Fátækt og auðlegð eru afstæð, eftir því hvort hún er veraldleg eða andleg.  Einhver er fátækur af veraldlegum hlutum en ríkur í hjarta og annar ríkur að veraldlegum hlutum en fátækur í hjarta. En við tengjum fátækt og ríkidæmi oftast við peninga.

Mark 12:41  Jesús settist gegnt fjárhirslunni og horfði á fólkið leggja peninga í hana. Margir auðmenn lögðu þar mikið. -42- Þá kom ekkja ein fátæk og lét þar tvo smápeninga, eins eyris virði.-43- Og hann kallaði til sín lærisveina sína og sagði við þá: Sannlega segi ég yður, þessi fátæka ekkja gaf meira en allir hinir, er lögðu í fjárhirsluna.-44- Allir gáfu þeir af allsnægtum sínum, en hún gaf af skorti sínum allt sem hún átti, alla björg sína.
Þarna er dæmi um beinharða peninga, aðalatriði sögunnar er upphæðin sem ekkjan gaf, jafngildi eins eyris. Það eru margir hafa áhyggjur af því hvað þeir geta lítið gefið í Guðshús og til Guðs málefnis. Ef til vill reyndi hún að lauma aurunum sínum í baukinn og vonast til að enginn sæi hve hún gæfi lítið. Hún er ekki ein um það... Samt vitum við að það er ekki upphæðin sem skiptir máli.

Samkvæmt þessari sögu metur Guð efni og ástæður hvers og eins. Sumir eru verr staddir og geta gefið minna en aðrir... og það á alveg eins við um tíma eins og peninga. Það á við um allt sem við leggjum til starfsins og kirkjunnar. Mín tilfinning gagnvart þessari sögu, var einhvern veginn sú, að það skipti mestu máli að ekkjan gaf... þó það væri lítil upphæð. Það munar um allt, eins og máltækið segir... margt smátt gerir eitt stórt. 

En ef Guð horfir á hjarta þess sem gefur, þá sér hann að bæði ríkir og fátækir geta verið aurasálir. Ríkur maður getur séð eftir lítilli gjöf og fátækur maður getur gefið stóra gjöf með gleði. Biblían segir að ef við gefum, þá skulum við gefa með gleði og vera trú í hinu smæsta. Guð elskar alla glaða gjafara. 

Auðurinn vill oft safnast á fáar hendur eins og sagt er. 
Biblían varar okkur margsinnis við að láta hin veraldlegu gæði gleypa hjörtu okkar, en lífið og lífsbaráttan er þannig hér á jörðinni að við höfum tilhneygingu til að safna að okkur meiru en við þurfum á að halda. Við kaupum hluti sem okkur bráðvantar í dag en eftir nokkra mánuði liggur hann ónotaður... jafnvel búið að gefa hann í góða hirðinn. Skildi vera slæmt að eiga mikið yfirleitt? Í gegnum alla ritninguna finnum við dæmi um auðlegð manna.

1.Mós 24:35  Drottinn hefir ríkulega blessað húsbónda minn, svo að hann er orðinn auðmaður. Hann hefir gefið honum sauði og naut, silfur og gull, þræla og ambáttir, úlfalda og asna. 
1Kon 10:23 Salómon konungur bar af öllum konungum jarðarinnar að auðlegð og visku.

Job 42:12 En Drottinn blessaði síðari æviár Jobs enn meir en hin fyrri, og hann eignaðist fjórtán þúsund sauða, sex þúsund úlfalda, þúsund sameyki nauta og þúsund ösnur. 
Abraham, Salómon, Job og margir fleiri voru flugríkir, þeir voru Guði þóknanlegir og þess vegna blessaði Guð þá ríkulega. Guð jók eignir þeirra svo þeir voru taldir auðmenn. Það getur því ekki verið Guði á móti skapi að það fari vel um okkur, að við eigum góðan og vandaðan fatnað, skartgripi, skrautmuni, gott hús, bíl (úlfalda nútímans) og svo framvegis, þegar hann blessar sitt fólk með því að auka eignir þeirra. Hættan er og Drottinn minnir okkur sjálfur á það, að við gleymum honum vegna þess að við höfum það svo gott.

Hós 13:6  En því meira haglendi sem þeir fengu, því saddari átu þeir sig. En er þeir voru saddir orðnir, metnaðist hjarta þeirra. Þess vegna gleymdu þeir mér.  Þegar allt gengur vel, gleymist Guð... og þeir muna ekki eftir honum aftur.. fyrr en þeir þurfa aftur á honum að halda. Oft er þörf en þegar allt gengur í haginn þurfum við stöðugt að þakka fyrir vernd hans og blessun. Hann hefur lofað því að hann muni vel fyrir sjá og hann stendur við sín loforð. 
Ef við gleymum honum, verður hjarta okkar fátækt. 

2.Kor 9:8   Guð er þess megnugur að veita yður allar góðar gjafir ríkulega, til þess að þér í öllu og ávallt hafið allt sem þér þarfnist og getið sjálfir veitt ríkulega til sérhvers góðs verks.  
Hann blessar okkur ríkulega, til þess að við höfum allt það sem við þörfnumst og til þess að við getum gefið öðrum. Guð ætlast ekki til að við sitjum á auðæfum okkar eins og ormar á gulli. Við eigum að gefa öðrum og gjöfin á að vera blessun ekki nauðung. 

Óskaði eftir að vera tekin af listanum...

Vissulega vil ég hafa ,,ókeypis" sjónvarp... en er einhver stöð ókeypis? Er fólkið þarna í sjálfboðastarfi, fær það ekki laun?... hvaðan koma launin?
Auglýsingarnar borga stöðina - hvar fá auglýsendur peningana sem auglýsingin kostar... auglýsingakostnaði er bætt ofan á vöruverð... Hver borgar þá fyrir Skjá einn???  Það erum við. Það er ekkert ókeypis.

CSI og House er það eina sem mér finnst horfandi á, á Skjá einum... en ég sakna þess ekki þó ég missi af þessum þáttum.

Vissulega má segja að samkeppnin sé ekki sanngjörn, en ég skrifaði ekki undir með það í huga að Rúv fengi ekki að auglýsa, þess vegna óskaði ég eftir að vera tekin af listanum.

Stillimynd á SkjáEinum í kvöld