Ef þú ert... - Matt. 4.kafli

-1- Þá leiddi andinn Jesú út í óbyggðina, að hans yrði freistað af djöflinum.
-2- Þar fastaði hann fjörutíu daga og fjörutíu nætur og var þá orðinn hungraður.
-3- Þá kom freistarinn og sagði við hann: Ef þú ert sonur Guðs, þá bjóð þú, að steinar þessir verði að brauðum.
-4- Jesús svaraði: Ritað er: Eigi lifir maðurinn á einu saman brauði, heldur á hverju því orði, sem fram gengur af Guðs munni.
-5- Þá tekur djöfullinn hann með sér í borgina helgu, setur hann á brún musterisins
-6- og segir við hann: Ef þú ert sonur Guðs, þá kasta þér ofan, því að ritað er: Hann mun fela þig englum sínum, og þeir munu bera þig á höndum sér, að þú steytir ekki fót þinn við steini.
-7- Jesús svaraði honum: Aftur er ritað: Ekki skalt þú freista Drottins, Guðs þíns.
-8- Enn tekur djöfullinn hann með sér upp á ofurhátt fjall, sýnir honum öll ríki heims og dýrð þeirra
-9- og segir: Allt þetta mun ég gefa þér, ef þú fellur fram og tilbiður mig.
-10- En Jesús sagði við hann: Vík brott, Satan! Ritað er: Drottin, Guð þinn, skalt þú tilbiðja og þjóna honum einum.

Það er þetta EF sem leiðir okkur oft afvega, eða fær okkur til að gera einhverja vitleysu... það að ætla að freistast til að sanna eitthvað fyrir öðrum. Djöfullinn freistaði Jesú þrisvar... tvisvar freistaði hann hans að sanna hver hann væri.
Djöfullinn á þennan heim, þessa jörð og í síðustu freistingunni vildi hann láta hana í skiptum fyrir tilbeiðslu.
Jesús sagði að það verði ekki fyrr en í lok þessa heims sem þessum höfðingja verður út kastað (Jóh 12:31) svo að þangað til verður heimurinn eins og hann er... eða fer versnandi. 
Baráttan milli góðs og ills verður lúmsk... jafnvel fyrir þá sem velja og vilja fylgja Jesú Kristi.

Takið sinnaskiptum - Matt. 3.kafli

-1- Á þeim dögum kemur Jóhannes skírari fram og prédikar í óbyggðum Júdeu.
-2- Hann sagði: Gjörið iðrun, (takið sinnaskiptum, útg.2007) himnaríki er í nánd.
-3- Jóhannes er sá sem svo er um mælt hjá Jesaja spámanni: Rödd hrópanda í eyðimörk: Greiðið veg Drottins, gjörið beinar brautir hans.

-5- Menn streymdu til hans frá Jerúsalem, allri Júdeu og Jórdanbyggð,
-6- létu skírast af honum í ánni Jórdan og játuðu syndir sínar.
-7- Þegar hann sá, að margir farísear og saddúkear komu til skírnar, sagði hann við þá: Þér nöðru kyn, hver kenndi yður að flýja komandi reiði?
-8- Berið þá ávöxt samboðinn iðruninni!
-9- Látið yður ekki til hugar koma, að þér getið sagt með sjálfum yður: Vér eigum Abraham að föður. Ég segi yður, að Guð getur vakið Abraham börn af steinum þessum.
-10- Öxin er þegar lögð að rótum trjánna, og hvert það tré, sem ber ekki góðan ávöxt, verður upp höggvið og í eld kastað.

Spádómar úr Gamla testamentinu voru að rætast... Menn gengu ekki með veggjum í boðuninni á dögum Jesú. Jóhannes boðar nýtt, nú skiptir bakgrunnur persónu engu máli. Það var kominn nýr mælikvarði.
Hvort menn eigi ,,Abraham" að föður eða ekki, hvort sá hinn sami var einstaklingur í hinni útvöldu þjóð eða ekki, var aukaatriði. Nú skipti máli að bera góðan ávöxt... það tré sem ber ekki góðan ávöxt verður upphoggið og í eld kastað...  

Jesús kom að ánni og vildi skírast... eftir það var starf hans hafið - öxin var lögð að rótum trjánna... þaðan í frá mundi hver sá sem trúir, hólpinn verða.

Gjörið iðrun - takið sinnaskiptum http://bryndissvavars.blog.is/blog/bryndissvavars/entry/659847/

Fóru í ranga borg - Matt. 2.kafli

-1- Þegar Jesús var fæddur í Betlehem í Júdeu á dögum Heródesar konungs, komu vitringar frá Austurlöndum til Jerúsalem
-2- og sögðu: Hvar er hinn nýfæddi konungur Gyðinga? Vér sáum stjörnu hans renna upp og erum komnir að veita honum lotningu.
-3- Þegar Heródes heyrði þetta, varð hann skelkaður og öll Jerúsalem með honum.
-4- Og hann stefndi saman öllum æðstu prestum og fræðimönnum lýðsins og spurði þá: Hvar á Kristur að fæðast?
-5- Þeir svöruðu honum: Í Betlehem í Júdeu...

Ótrúlega margir halda því fram að vitringarnir hafi verið 3, tala þeirra er hvergi nefnd en gjafirnar voru 3, gull reykelsi og myrra.
Það er athyglisvert að vitringarnir fara beint til Jerúsalem þó að fæðingin eigi að eiga sér stað í Betlehem... Þeir sáu stjörnuna, fylgdu henni en fóru samt í ranga borg... kannski var það beinlínis ætlað til að Heródes spyrði æðstupresta gyðinga hvar Kristur ætti að fæðast. 

Á þessum tíma voru flestir gyðingar það sem er kallað Díaspora, þ.e. gyðingar í dreifingunni... aðeins lítill hluti þeirra var í borgum. Gyðingar tóku ekki stjórnunarembætti og höfðu þess vegna ekki stjórnmálaleg áhrif og konungi stóð engin ógn af þeim. Aftur á móti hlýddu gyðingar æðstuprestum sínum þannig að það var betra fyrir konung að hafa æðstuprestana með sér.

Konungur gyðinga var aftur á móti embætti sem gat ógnað Heródesi konungi og lét hann því myrða öll sveinbörn, tvævetur og yngri í Betlehem og nágrenni.
Allt þetta hefði átt að vekja gyðinga til umhugsunar um að nú væri frelsari þeirra fæddur og að spádómarnir sem þeir biðu eftir að rættust, væru að rætast.

Guð sér fyrir öllu - Matt. 1.kafli

Höfundur guðspjallsins er talinn vera tollheimtumaðurinn Matteus (Matt 9:9) sem Markúsarguðspjall segir að sé einnig kunnur sem ,,Leví Alfeusson" (Mark 2:14).
Guðspjallið er sennilega skrifað á því tímabili sem Rómverjar lögðu musterið í eyði (70 e.Kr.) og virðist það vera beinlínis skrifað fyrir gyðinga með áherslu á að sanna fyrir þeim (með vitnisburði í Gt) að Jesús væri sannarlega Messías, sá sem þeir biðu eftir... þ.e. uppfylling spádómanna.
Það sem sker þetta guðspjall frá hinum er að Matteus er eini guðspjallamaðurinn sem notar hugtökin ,,kirkja" og ,,himnaríki." 

Matteusarguðspjall er fremst guðspjallanna vegna þess að það er gyðinglegast. Þess vegna hefur það verið talið góð tenging frá Gamla testamentinu yfir í Nýja testamentið.
Að góðum og gildum ástæðum og að íslenskum sveitasið er nauðsynlegt að fyrir þá sem lesa að vita hverra manna aðalpersónan er.
Guðspjallið byrjar á ættartölu ,,Jesú" en ef betur er að gáð er þetta ættartala Jósefs, sem kristnir menn vita að er ekkert skyldur Jesú. Ættartala Jesú hefði verið mjög stutt... Guð gat Jesú, sem var einn getinn af honum, þ.e. einkasonur hans.

Matt.1;1 Ættartala Jesú Krists, sonar Davíðs, sonar Abrahams.
-16- og Jakob gat Jósef, mann Maríu, en hún ól Jesú, sem kallast Kristur.

Það segir að ,,áður en þau, María og Jósef, komu saman" var hún þunguð af heilögum anda. Þótt Jósef væri réttlátur maður ráðgerði hann að skilja við Maríu í kyrrþey... en engill Drottins vitraðist honum í draumi og hann tók Maríu til sín.

Samkvæmt hefðinni hefði María verið grýtt til bana ef það hefði uppgötvast að hún hefði orðið þunguð fyrir brúðkaupið. Það hefur því verið góð yfirhylming fyrir lengd meðgöngutímans, að María og Jósef þyrftu að fara burt og skrásetja sig í borg Davíðs... og að þau hafi flúið þaðan til Egyptalands.
Guð sér fyrir öllu, stóru sem smáu

Elkton MD - Sea Isle City NJ

Ég lagði af stað rétt fyrir kl.8. Svaf frekar illa í nótt, kannski stressuð yfir að eiga eftir að finna hótel í New Jersey. Ég var nefnilega margbúin að tékka á nokkrum síðum og það var allt svo dýrt og langt í burtu.
Þess vegna var það best að kíkja á staðinn... það voru um 100 mílur þangað og þá komst ég að því að flest allt er lokað þarna á þessum tíma... þetta er eiginlega draugabær

Svo ég keyrði 10-12 mílur í burtu og fékk mér gistingu á Econo Lodge. Þessi mótelkeðja er óðum að verða í eigu Indverja og um leið og mótelin verða fjölskyldufyrirtæki, þá byrja þau að drabbast niður  
Eftir að hafa sett tölvuna í gang og talað við Bíðara nr.1 þá ákvað ég að fara og athuga hvort það væri ekki buffet hér nálægt.
Ég verð hérna í 2 nætur. Ég tékka mig út á sunnudagsmorguninn þegar ég fer í maraþonið.

Econo Lodge (NJ708) 119 US 9 S. , Marmora, NJ, US, 08223 | Phone: [phone] room 157   

Musterið í hinni nýju Jerúsalem

 Jóh 4:19-21
-19- [Samverska]konan segir við hann[Jesú]: Herra, nú sé ég, að þú ert spámaður.
-20- Feður vorir hafa tilbeðið Guð á þessu fjalli, en þér segið, að í Jerúsalem sé sá staður, þar sem tilbiðja skuli.
-21-Jesús segir við hana: Trú þú mér, kona. Sú stund kemur, að þér munuð hvorki tilbiðja föðurinn á þessu fjalli né í Jerúsalem.

Þegar Jesús dó og fortjaldið rifnaði, færðist hið allra helgasta upp til himins, til hinnar nýju Jerúsalemborgar. Jesús sagði að hann færi að búa okkur stað og þar sem við verðum, mun musteri Drottins einnig vera svo við getum tilbeðið hann þar.

Opb 3:12  Þann er sigrar mun ég gjöra að stólpa í musteri Guðs míns, og hann skal aldrei þaðan út fara. Á hann mun ég rita nafn Guðs míns og nafn borgar Guðs míns, hinnar nýju Jerúsalem, er kemur af himni ofan frá Guði mínum, og nafnið mitt hið nýja.

Sú Jerúsalem sem menn horfa til í Ísraelsríki nútímans, hefur skilað sínu hlutverki. Að sjálfsögðu verður fólk sem fer þangað fyrir hughrifum, þarna gekk Jesús um strætin og þarna var hann líflátinn. Þetta er Jerúsalem sögunnar. Kristnir menn eiga að beina sjónum sínum til himins, því borgin helga mun koma af himni ofan.

Opb 21:2 Og ég sá borgina helgu, nýja Jerúsalem, stíga niður af himni frá Guði, búna sem brúði, er skartar fyrir manni sínum.

Virginía Beach til Elkton Md

Ég vaknaði snemma... fyrir kl 6 í morgun. Hellti mér á og borðaði beyglu með kaffinu. Gullið mitt hringdi... alltaf gott að heyra í honum.

Ég var búin að ákveða að keyra norður í dag. Ég hefði getað verið hérna lengur en það er ekki nógu hlýtt því íslenska rokið nær hingað... ég er svo heppin að vera við ströndina

Ég tók dótið saman, tékkaði mig út og var lögð af stað kl 8... Garmurinn segir að það séu 330 mílur til Elkton og það reyndist vera rétt.
Ferðin gekk ágætlega. Ég fór gegnum Norfolk, göngin yfir til Hampton og norður 64. Ég stoppaði einu sinni í klukkutíma í Fredericksburg.
Seinfarnasti kaflinn var í gegnum Washington DC... þar slitnar hraðbrautin í sundur og ég þurfti að þræða litlar götur hægri - vinstri til að komast aftur á I-95 hinum megin við borgina.

Garmurinn sendi mig ekki alveg sömu leið og ég fór suður... ég fór t.d. ekki yfir stíflu fyrir norðan DC og eftir íslenskum sveitavegi (ein akgrein í hvora átt) áður en ég beygði inn á 222 eitt augnablik og svo á 95... Ég var 7:30 tíma með stoppinu á leiðinni.

Musterið í Jerúsalem í Nt

Ríki Davíðs og Salómons klofnaði í tvennt og hvort ríki um sig féll fyrir grannríkjunum. Norðurríkið féll 722 F.Kr og Suðurríkið 130 árum síðar, eða 586 F.Kr. Þegar Suðurríkið féll misstu Ísraelsmenn musteri sitt... Samkvæmt trú manna táknaði fall musteris að guðinn hefði yfirgefið það.

Það segir í Jóh 2:20....að musterið hafði verið 46 ár í smíðum. Þegar æðstipresturinn Jesús Kristur mætti á svæðið, þá þekktu þeir hann ekki og afneituðu honum sem syni Guðs og frelsara sínum.

Jesús sagði er hann horfði yfir Jerúsalem í síðasta sinn, (Matt 23:38)  Hús yðar verður í eyði látið... Nýja þýðingin orðar það svona: Guð mun yfirgefa musteri yðar og það verður lagt í rúst.

Þegar Jesús dó á krossinum, rifnaði fortjaldið sem aðskildi hið helgasta og hið allra allrahelgasta (þar sem Guð bjó) í musterinu, en þangað inn fór æðstipresturinn aðeins einu sinni á ári og friðþægði fyrir syndir sínar og lýðsins. Hið allrahelgasta var svo heilagt svæði að æðstipresturinn var með band í sér svo hægt væri að draga hann út, ef hann dæi þar inni.
Þegar Jesús dó, rifnaði fortjaldið - Guð flutti út úr musterinu...

Post 6:14  Vér höfum heyrt hann segja, að þessi Jesús frá Nasaret muni brjóta niður musterið og breyta þeim siðum, sem Móse hefur sett oss.

Jóhannes skírari boðaði mönnum sinnaskipti... "change of mind" að skipta um skoðun, láta af hinu gamla og taka upp nýtt lögmál, lögmál trúarinnar... En fátt er eins erfitt og að ætla að breyta trúarsannfæringu annarra...

Musteri Drottins í Jerúsalem

Gamla testamentið - Gamli sáttmáli er saga óhlýðinnar þjóðar, þjóðar sem Guð valdi til forystu, en þjóðin brást, eins og við bregðumst öll... óhlýðni, eigingirni og græðgi láta okkur haltra til beggja hliðina í lífinu.
Hvernig sem við reynum, þá verður einhver prósenta af gjörðum okkar röng... afleiðingarnar eru ekki alltaf slæmar fyrir okkur sjálf, en það réttlætir ekki það sem er rangt í upphafi.

Menn líta til Salómons konungs með lotningu, hann var mikilmenni, valinn til forystu af Guði, sonur Davíðs og Batsebu. Viska hans er rómuð en hann hrasaði eins og aðrir breyskir menn. Davíð faðir hans hafði ekki fengið að byggja musteri fyrir Guð, musterisþjónustan fór fram í tjaldi. Salómon fékk það hlutverk að byggja musterið. Það segir frá byggingu þess í 1.Kon.6:2-3

-2- Musterið, sem Salómon konungur reisti Drottni, var sextíu álnir á lengd, tuttugu álnir á breidd og þrjátíu álnir á hæð.
-3- Forsalurinn fyrir framan musterishúsið var tuttugu álnir á breidd fram með musterisendanum og tíu álnir á dýpt fram af musterinu.
Í lok 6.kafla segir að bygging musterisins hafi tekið 7 ár.

Í upphafi 7.kafla segir að Salómon hafi verið 13 ár að byggja höll sína...
-2- Hann byggði Líbanonsskógarhúsið, er var hundrað álnir á lengd, fimmtíu álnir á breidd og þrjátíu álnir á hæð
-6- Hann gjörði súlnasal, fimmtíu álnir á lengd og þrjátíu álnir á breidd, og forsal þar fyrir framan ...
-7- Hann byggði hásætissal, þar sem hann kvað upp dóma dómhöllina,...

Auk þess lét Salómon byggja fyrir sig hús sem hann bjó í... Húsin sem Salómon ætlaði sjálfum sér voru stærri en það sem hann gerði fyrir Guð. Hvaða skilaboð er hægt að lesa út úr þessu... Var Salómon meiri en Guð? En Guð getur fyrirgefið alls kyns yfirsjónir en ekki að menn dýrki aðra guði.

Í 1.Kon.9:1-9 birtist Guð Salómon og sagði:
-5- þá vil ég staðfesta hásæti konungdóms þíns yfir Ísrael að eilífu, eins og ég hét Davíð föður þínum, er ég sagði: Eigi skal þig vanta eftirmann í hásæti Ísraels.
-6- En ef þér snúið baki við mér, þér og synir yðar, og varðveitið eigi boðorð mín og lög, þau er ég hefi lagt fyrir yður, en farið og þjónið öðrum guðum og fallið fram fyrir þeim,
-7- þá mun ég uppræta Ísrael úr því landi, sem ég gaf þeim, og húsinu, sem ég hefi helgað nafni mínu, mun ég burt snara frá augliti mínu, og Ísrael skal verða að orðskvið og spotti meðal allra þjóða.
-8- Og þetta hús, svo háreist sem það er hver sem gengur fram hjá því, honum mun blöskra og hann mun blístra. Og er menn spyrja: Hvers vegna hefir Drottinn leikið svo hart þetta land og þetta hús?
-9- munu menn svara: Af því að þeir yfirgáfu Drottin, Guð sinn, er leiddi feður þeirra af Egyptalandi, og héldu sér að öðrum guðum, féllu fram fyrir þeim og þjónuðu þeim. Fyrir því hefir Drottinn leitt yfir þá alla þessa ógæfu.

Nú stendur moska á rústum musterisins í Jerúsalem - Hvaða skilaboð eru það?

Allt er þegar þrennt er

Máltækið segir: Allt er þegar þrennt er og Gamla testamentið segir að Guð hafi gert 3 sáttmála. 
Sá fyrsti var við Nóa, 1.Mós.9;11 en tákn hans er regnboginn.

-11- Minn sáttmála vil ég gjöra við yður: Aldrei framar skal allt hold tortímast af vatnsflóði, og aldrei framar mun flóð koma til að eyða jörðina.
-12- Og Guð sagði: Þetta er merki sáttmálans, sem ég gjöri milli mín og yðar og allra lifandi skepna, sem hjá yður eru, um allar ókomnar aldir:
-13- Boga minn set ég í skýin, að hann sé merki sáttmálans milli mín og jarðarinnar.

Annar sáttmálinn var við Abraham 1.Mós.17:9 en tákn þess sáttmála er umskurnin.

-9- Guð sagði við Abraham: Þú skalt halda minn sáttmála, þú og niðjar þínir eftir þig, frá einum ættlið til annars.
-10- Þetta er minn sáttmáli, sem þér skuluð halda, milli mín og yðar og niðja þinna eftir þig: Allt karlkyn meðal yðar skal umskera.
-11- Yður skal umskera á holdi yfirhúðar yðar, og það sé merki sáttmálans milli mín og yðar. 

Síðasti sáttmálinn var gerður á Sínaí-fjalli 2.Mós.31:12 og tákn hans er hvíldardagurinn.

-12- Drottinn talaði við Móse og sagði:
-13- Tala þú til Ísraelsmanna og seg: Sannlega skuluð þér halda mína hvíldardaga, því að það er teikn milli mín og yðar frá kyni til kyns, svo að þér vitið, að ég er Drottinn, sá er yður helgar.
-14- Haldið því hvíldardaginn, því að hann skal vera yður heilagur. Hver sem vanhelgar hann, skal vissulega líflátinn verða, því að hver sem þá vinnur nokkurt verk, sá maður skal upprættur verða úr þjóð sinni.
-15- Sex daga skal verk vinna, en sjöundi dagurinn er algjör hvíldardagur, helgaður Drottni. Hver sem verk vinnur á hvíldardegi, skal vissulega líflátinn verða.

Fyrst sáttmálinn var við Nóa, annar við Abraham og niðja hans og sá síðasti til Ísraelsmanna í eyðimörkinni. Margir telja regnbogann enn vera sáttmála við Guð, kristnir menn stunda ekki umskurn og enginn... sama hversu trúaður hann er... virkilega heldur hvíldardaginn.

Samt sem áður er hvíldardagurinn það eitt það besta sem Guð hefur gefið okkur, því við þurfum að hvíld og endurnæringu - á sál og líkama.

Í upphafi skapaði Guð...

Biblían byrjar á þessum orðum... Í upphafi skapaði Guð himin og jörð. Það kemur vel til greina að þetta upphaf hafi verið löngu áður en önnur sköpun hófst. Hver erum við, að fella dóma um hvað tímanum leið. Það var ekki einu sinni búið að skapa ,,tímann."

Sköpunarsögurnar eru tvær og heimildakenning Wellhausens telur þær skrifaðar eftir að ríki Salómons klofnaði í tvennt. Wellhausen telur aðra söguna vera skrifaða í Norðurríkinu Efraím (E-heimild) og hina í Suðurríkinu Júda (J-heimild).
Telur hann að eftir að gyðingar hafi orðið land-og musterislausir, þ.e. eftir að bæði ríkin féllu þá hafi saga gyðinga verið fléttuð saman á einhverjum ákveðnum tíma. Vegna þess að gyðingar töldu textann heilagan mátti ekki breyta honum og gætir því nokkurs misræmis í textanum og oft tvær frásagnir af sama atburði.

Fyrri sköpunarsagan 1.Mós.1:1-2:4, fylgir E-heimild en hún notar nafnið Elóhím fyrir Guð. Í fyrri sköpunarsögunni lýkur Guð verki sínu með því að skapa manninn. Samkvæmt þeirri heimild heitir fjallið helga Hóreb, Jetro er tengdafaðir Móse (2.Mós 3:1) og íbúar fyrirheitna landsins eru Amorítar.

Síðari sköpunarsagan 1:Mós.2:5-3:24 fylgir J-heimild en þar er notað nafnið Jahve sem er þýtt Drottinn Guð. Í síðari sköpunarsögunni byrjar Guð á að skapa manninn og hann mótaði hann með eigin höndum. Samkvæmt heimildinni heitir fjallið helga Sínaí, í 4.Mós 10:29 heitir tengdafaðir Móse, Hóbab Regúelsson og samkvæmt J-heimild eru íbúar fyrirheitna landsins, Kanverjar.  

Sitthvort nafnið, Elóhím eða Jahve, yfir Guð er því skýringin á því hvers vegna stendur Guð eða Drottinn Guð amk í Mósebókunum.

Rok og kuldi á Virginia beach

 

Sólin skín en það er kalt hér núna... eins gott að maraþonið var ekki í dag. Ég ætlaði að sofa lengi af því að ég sofnaði frekar seint, en ég var vöknuð fyrir allar aldir.

Ég fór ekki út fyrr en eftir kl 10... kíkti í nokkrar búðir og fékk mér bröns á Ihop um 2leytið... þarf ekki að borða meira í dag.

Ég fékk mér göngutúr í rokrassinum og kuldanum, meðfram ströndinni, þangað sem maraþonið endaði í gær... ætlaði að mynda sandlistaverkið sem var þarna í gær en það var ónýtt.  

Tók myndir af Sjávarguðinum Neptunus og pálmatrjánum sem eru í smokkum á veturna til að verja þau kuldanum.

Verð að vera með netið

Hljóp maraþonið í morgun, gekk bara ágætlega. Þegar ég kom til baka ætlaði ég auðvitað á netið... en tengingin virkaði ekki... svo það var ekki annað að gera en að kvarta. Þegar ég kom með tölvuna niður í lobbý-ið virkaði það.

Kom þá upp úr kafinu að það hafði verið tómt vesen með netið á 6.hæð... Nú er ég á 2.hæð - herbergi 209... því ekki get ég netlaus verið

Virginia Beach

Ég lagði af stað kl 8 í morgun og var 3 og 1/2 tíma á leiðinni (217 mílur), keyrði suður 95 mesta allan tímann, en svo 64 E... tveggja akgreina sveitaveg, með 65 hámarkshraða... það keyrðu allir samt á 80.

Hótelið er á besta stað fyrir mig, göngufæri ca hálf míla á startið og styttra í markið, þannig að ég þarf ekki að pæla í bílastæði á morgun, enda er gert ráð fyrir þeim lengra í burtu.  ég fór á expo-ið, það var glæsilegt hjá svona litlu hlaupi... nóg til sölu en mig vantaði ekkert. ég var í klst. brasi við netið, ætlaði aldrei að komast inn, ég hafði nefnilega asnast til að uppfæra msn-ið og ég verð að henda því út aftur, tölvan er skelfing á eftir... svo ég lét þetta eiga sig og fór út eh.

Ég skrapp í Target, og fékk mér að borða. Ætla að taka saman hlaupadótið og fara snemma að sofa.

Super 8 Virginia Beach/At The Ocean
2604 Atlantic Ave,  Virginia Beach, VA 23451 US
Phone: [phone]  Room 608 

Í Washington DC

Síðustu nótt gisti ég á sexu í Elkton, ég hefði getað keypt internetaðgang en þá hefði ég líka þurft að skipta um herbergi... svo ég lét það eiga sig. Ég var líka orðin þreytt, búin að keyra í 6 tíma og 45 mín... 430 mílur. Ég fékk mér bara kálpoka í Walmart og fór fljótlega að sofa.

Í dag er ég komin til DC, búin að kíkja í expo-ið, eins og ég bloggaði um á hlaupasíðunni minni... þó ég ætli að sleppa maraþoninu á morgun og svo skellti ég mér á Old Country Buffet. Nú ætla ég bara að fara í sturtu, kíkja í tölvuna og lesa... sennilega fer ég aftur snemma að sofa.

Super 8 Camp Springs/Andrews AFB DC Area
5151 B Allentown Rd
Andrews AFB I-95 Exit 9
Camp Spring, MD 20746 US
Phone: [phone] Room 173