Annáll fyrir árið 2022

TAKK FYRIR ALLT GAMALT OG GOTT

           ÁRAMÓTA-ANNÁLL FYRIR ÁRIÐ 2022

Við Lúlli óskum öllum Guðs blessunar, gæfu og góðs gengis á komandi ári um leið og við þökkum fyrir árið sem er að líða. 

Árið byrjar alltaf eins... á afmælisdegi elstu lang-ömmu-stelpunnar minnar /okkar.. (Lúlli á eldri)... Emilía Líf er 11 ára í dag, nýjársdag 2023... en fjölskyldan býr í Stavanger í Noregi.

STARFIÐ
Í covid var ég dugleg að setja myndbönd á netið og þá varð til myndband hjá mér sem ég nefndi ,,Heima með presti".. og í lok janúar ákvað ég að setja inn efni vikulega og tala út frá þema sunnudaganna í kirkjuárinu.. Í júlí fór ég í þriðja sinn og messaði í Hóladómkirkju.. Ég var atvinnulaus mest allt árið.. sótti um nokkrar prestsstöður á árinu án þess að fá.. minnistæðasta viðtalið við sóknarnefnd var þegar ég var í USA, og stoppaði í Walmart til að komast á netið, svaraði spurningum nefndarinnar og var með hugvekju í gegnum símann.. Um sumarið leysti ég af í Lágafellsprestakalli, Mosó.. I LOVED IT.

FJÖLSKYLDAN
Mamma fékk heilablóðfall í nóv 2021 og hefur verið bundin við hjólastól síðan því mátturinn hefur lítið komið til baka.. Af börnunum eru góðar fréttir, Árný í Njarðvík, Helga á Ásbrú, Harpa hér á Völlunum og Svavar og Lovísa í Reykjavík.. en stærsti viðburðurinn var brúðkaup Lovísu og Gunnars á menningarnótt. Ég fékk þann heiður að gefa þau saman á heimili þeirra í Mosó.. og af því tilefni komu Bryndís Líf og Jarle með stelpurnar til landsins.. Nokkru síðar trúlofuðust Helga og Gunnar.. Í haust fengum við þær sorglegu fréttir að María Mist hefði greinst með MS sjúkdóminn.. og er hún í bænum okkar allra. 

FERÐALÖG
Það er sagt að árin fari að hlaupa eftir miðjan aldur.. það er rétt, ég man ekki eftir öðrum eins hraða á neinu ári.. Eftir að hafa ekki getað ferðast í 2 ár, komst ég loksins í hlaupaferð í mars, flaug til Orlando og keyrði til Alabama.. það setti allt í ferðagírinn og ég fór reglulega erlendis að hlaupa.. Í Covid urðum við Lúlli að fresta ferð með Völu og Hjödda til Zion Utah, en við komumst í þessa ferð í lok sept. Ferðin var frábær.. og árið í alla staði gott. Þá má bæta við að ég fór tvisvar með Hörpu í tannlæknaferð til Budapest.

HREYFING
Ég hljóp 10 maraþon á þessu ári.. Ég átti aðgang í 2 maraþon frá síðasta ári sem hafði verið frestað, eins og t.d. Tokyo, sem var frestað aftur og átti ég aðgang í mars 2023. Ég átti bæði aðgang í Anchorage í Alaska og í Reykjavík.. en bæði maraþonin lentu á menningarnótt og ég valdi brúðkaupið AÐ SJÁLFSÖGÐU.. Við Vala hjóluðum, gengum og skokkuðum á árinu, mest úti í náttúrunni kringum Ástjörn og Hvaleyrarvatn.. Ég tók ratleikinn öll 27 spjöldin með systrunum.. Matthías, Indía og Mikael urðu léttfetar.

https://www.youtube.com/watch?v=oRE-mfVP7h8

GLEÐILEGT ÁR 2023 

 

Ratleikurinn í fullum gangi

Við Svavar eigum bara 2 spjöld eftir... ég hef verið að fara í annað og þriðja sinn í leit að hinum spjöldunum og þá með Tinnu og Berghildi. Upp á síðkastið höfum við fléttað berjatínslu og hellaskoðun við ratleikinn - sem gerir þessar ferðir að hreinu ævintýri.

Við fórum ofaní Skátahelli í Heiðmörk en það eru komin yfir 40 ár síðan ég fór fyrst ofaní þennan helli og það er alltaf jafn gaman. Ég man eftir borði í gamla daga... það hafði verið smíðað úr fjölum. Mér finnst leiðinglegt hvað fólk skilur eftir mikið af rusli - alls staðar voru sprittkerti, pokar og fl. Hellirinn er samt spennandi og nú fer ég með barnabörnin ofaní hann  

Berjatínslan hefur líka verið frábær - hvílík spretta og berja-hlunkar sem við erum að borða á kvöldin með sykri, ís og þeyttum rjóma... ummmm    

Fyrir og eftir !

Nú hef ég varla kíkt inn á þessa síðu siðan ég fór á Facebook... sem er sennilega ein mesta tímasóun sem til er. Fólk er yfirleitt ekki að segja neitt - ekki ég heldur... Það er svo sem ekkert nauðsynlegt að vera eilíft með einhverjar tilkynningar en hvílíkur tími sem fer í að skoða "comment" vinanna... stundum skrifa ég - stundum ekki.
Undanfarið hef ég líka verið latari að kíkja á facebook og ætla að láta það eftir mér að vera löt við þessa síðu þar til ég byrja aftur í skólanum í haust... nema það gerist eitthvað sérstakt.

  Afmælisbarn mánaðarins:
ADAM DAGUR sem verður 11 ára 30.júní... Til hamingju ömmustrákur

Hafið það gott í sumar og keyrið varlega

Bestu-flokkarnir

Bestu-flokkarnir voru eina tækifæri fólksins til að tjá óánægju sína með stjórnmálaflokkana sem voru fyrir. Það hefur enga þýðingu að skila auðu eða ógildu... atkvæðin sem eru gild tengjast alltaf sama gamla liðinu sem var við völd og verður þá aftur við völd eftir kosningarnar.

Besti flokkurinn í Reykjavík, næstbesti flokkurinn í Kópavogi og L(angbesti) flokkurinn á Akureyri voru því eina tækifærið sem kjósendur höfðu til að sýna stjórnmálamönnum að þeim var alvara, þeir vilja fá þá frá völdum.

Besti flokkurinn stærstur

Hambó með Beggu á morgun :P

Frábært... það jafnast fátt á við að hitta Beggu í hambó... á Stælnum :D... fæ mér einn djúsí ostborgara...

Fékk þetta frá Natalie

Óskir mínar til þín á árinu 2010:
Megi friður brjótast inn á heimili þitt og þjófar stela skuldum þínum.
Megi seðlaveski þitt verða segull á fimmþúsundkalla.
Megi ástin loða við andlit þitt eins og vaselín
Megi hlátur ráðast á varir þínar.
Megi hamingjan slá þig utanundir og tár þín vera gleðitár.
Megi vandamál fyrra árs......... gleyma heimilisfanginu þínu.

Bræður Keikó

Háhyrningar er vargar, þeir gera meira en veiða sér til matar, þeir murka lífið úr bráðinni og leika sér að henni í leiðinni.
Þrátt fyrir þetta var lagt í óhemju kostnað á sínum tíma til að ,,bjarga" Keikó... Börn um allan heim tæmdu sparibaukana sína og enginn sagði þeim að þessar skepnur dræpu sér til skemmtunar dýrin sem þessum sömu börnum þótti vænt um og voru í næstu laug í dýragarðinum.

Háhyrningar murkuðu lífið úr höfrungum

Glæsilegt hjá honum

Maðurinn er grínisti - en þetta er ekkert grín. Það er ótrúlegt að hann hafi einungis æft sig í 5 vikur fyrir þetta... ég er viss um að hann hvíli sig lengur en það á eftir, ef hann hefur ekki fengið yfir sig nóg af hlaupum í þessu átaki.

Það fylgdi fréttinni að hlaupurum væri ráðlagt að taka sér 3ja vikna hvíld á milli maraþona, ég hef hvergi séð það, en þegar ég var að byrja að hlaupa maraþon þá hlupu menn EITT maraþon á ári, í mesta lagi TVÖ... svo tímarnir eru breyttir.

Hljóp 43 maraþonhlaup á 51 degi

Tókum sólina úr töskunni...

Við vorum svo blessuð í síðustu ferð, að fá alla sólardagana þar sem við vorum...   

Veðurspáin var nefnilega ekki góð á neinum staðanna... Það átti að vera rigning í w-Virginíu en fengum sæmilegt veður og það var sól þennan eina dag sem maraþonið var... síðan færðum við okkur til Hagerstown í Maryland og þá var sól á meðan við vorum þar... og það var sól í New Jersey... byrjaði að rigna þegar við vorum komin í flugvélina til Alaska... og að lokum átti að vera rigning í Alaska... en var sól á meðan við vorum þar... byrjaði að rigna þegar við vorum í flugstöðinni... auðvitað af því að þá vorum við búin að pakka sólinni niður - til að taka hana með okkur heim

Hagl í Hafnarfirði

Það hefur enginn minnst á það að það kom hagél í Hafnarfirði í gær... nánar tiltekið á Völlunum í Hafnarfirði.

Ekki beint árstíminn fyrir haglél... en fyrir mörgum árum þegar ég hljóp Bláskógaskokkið (frá Þingvöllum til Laugavatns) þá fengum við sýnishorn af öllu veðri tvisvar sinnum á þessari 16 km leið. Við byrjuðum í sól og blíðu, svo hvessti, síðan rigndi og á eftir kom haglél... og svo aftur sama rútínan og þetta var í júlí.

Eins og maður segir... það er aldrei hægt að treysta á veðrið á þessu landi.

Óvenju kalt í háloftunum