Ísak Lúther 13 ára

Vá hvað tíminn flýgur... hann er orðinn 13 ára
Hetjan gekk á Esjuna um daginn, þá var þessi mynd tekin. Frá Steini og upp á topp fengum við þoku og kulda... og sannaðist að ,,það er kalt á toppnum"

 Innilega til hamingju með daginn elsku strákurinn okkar...

Óskum þér gæfu og gengis og skemmtunar í kvöld, en við vitum að í kvöld verður mynda-dekurkvöld með pizzu og nammi  

Hvernig er ,,Gengið" ?

Evran hafði áhyggjur af því í dag að Fimmvörðuháls væri kannski of áhættusamur í sumar... það eru jarðhræringar undir Eyjafjallajökli.

Ég er sammála... það er óþarfi að velja gönguleið með titringi !!!

Í þessum skrifuðu orðum flýgur þyrlan stöðugt yfir með sjó til að slökkva sinueld milli Helgafells og Valabóls... er ekki bara tilvalið að skreppa á Keili - Ég er til á föstudag - hvað með ykkur?

Dætradagur í dag

Við heimsóttum dæturnar allar þrjár eh í dag. Keyrðum suðureftir, byrjuðum í Vogunum hjá Hörpu, Óla og sonum.  Þaðan fórum við til Lovísu og Gunna... en prinsinn á heimilinu er 2ja mán í dag... og enduðum hjá Helgu, Týra og Tinnu.
Helga var akkúrat að leggja sig og eina sem við hittum ekki... Týri gaf okkur kaffi í staðinn ;)

Það verður að hafa fleiri svona daga

Harry Potter

Skellti mér í bíó í gærkvöldi, 10 sýningu í Kringlunni... keypti miðann á midi.is sem er nú ekkert nema snilld...
Ég var með elstu mönnum!!! Spennan í salnum var gífurleg... en spennan náði mér aldrei - spurning hvort ég sé orðin svona ólseig???
Nú er bara spurning hvort það verður framhald... Harry Potter í heimi fullorðinna, að kljást við kreppu, skuldir og ástarmál og fl?

Selvogsgatan á hraðferð

Maðurinn keyrði mig upp að neyðarskýlinu á Bláfjallavegi... þar sem vegurinn sker Selvogsgötuna. Þar stendur á skilti að leiðin sé 18 km.
Ég gekk ein... lagði af stað 11:52... nákvæmlega.
Ég hafði ákveðið að ganga hratt og stoppa ekkert á leiðinni. Það fór nú aðeins út í öfgar því stundum hljóp ég næstum við fót.  Einu sinni datt ég kylliflöt, stangaði jörðina en var svo blessuð að meiða mig ekki... og oft rak ég tærnar í án þess að detta. 
Fuglarnir létu heyra í sér, yrðlingur skaust inn í vörðu þegar ég var komin upp að honum og nokkrar kindur voru með lömb á beit... ég var eina manneskjan á ferð.
Hraðametið mitt féll í þessari ferð því ég kom niður á veginn við Hlíðavatn kl 14:39. Gangan var semsagt 2 tímar og 47mín.

Hjólhýsið beið í Selvoginum þar sem Lúlli grillaði og dundaði við viðhald... við ætluðum upphaflega að gista þar en ég vildi fara heim eftir kvöldmatinn svo við renndum heim aftur.

Tók ísbjörninn hálstaki

Þessi var á göngugötunni á Akureyri...

það var engin stórhætta af honum... en hann var ekki einu sinni í bandi... svo ég tók hann hálstaki svo hann væri til friðs amk á meðan ,,stórsteikurnar" sprönguðu léttklæddar um fyrir framan nefið á honum.

Esjan í dag

,,Gengið" tók sig til og gekk á Esjuna í dag. ,,Dollarinn" mætti ein, ,,Evran" var með 2 smápeninga og ,,Líran" kom með 1 smápening.  Smámyntirnar, Ísak Lúther, Adam Dagur og Tinna Sól... voru sannkallaðar hetjur, þær klifu Esjuna í fyrsta sinn í dag... fóru alla leið upp á topp ásamt mæðrum sínum og mér, ömmunni...

Ég hef gengið öðru hverju á Esjuna en aldrei nokkurn tíma pælt í því hve spottinn er langur.
Á síðustu öld... hu-hummm.. tók ég tvisvar þátt í Esjuhlaupinu og var þá 52 mín á toppinn og þá var farin lengri leiðin... og þegar ég fór með Völu á Esjuna í maí sl.  þá sagði hún mér að ÍR-ingarnir reiknuðu erfiðleikagráðuna á við 10 km.

Við fórum lengri leiðina upp í dag og ég tók báða ,,garmana" með mér. Garmin úrið mældi 3,5 km upp að Steini og 4,2 km upp á topp, en vegagarmurinn mældi 2,6 km beina vegalengd.

Þegar við vorum komin upp að Steini - kom þokan æðandi upp hlíðina með raka og brennisteinsfýlu... við héldum áfram þó við værum algerlega búin að missa útsýnið og krakkarnir voru bara enn meiri hetjur í roki og kulda á toppnum. Keðjurnar voru mest spennandi

Þetta var erfitt en verður hetjuskapur í minningunni og en það er óvíst hverjir verða þreyttastir í kvöld

Dýrðardagur í dag

Það var rigning í morgun, DAGUR fyrir innivinnu :) og maðurinn hélt myndarskapnum áfram - búinn að mála herbergið. Næst er að kaupa og setja saman fataskápa.

Á morgun er planið að ég sjái áfram um almannatengsl og fari á Esjuna á morgun með börnum og barnabörnum. Þar verða sumir hetjur í annað sinn. Það er gríðarlega mikilvægt í svona ferðum að hafa mikið nesti og taka sér góðan tíma. Spáin er góð... en það er jafn nauðsynlegt og nestið.

Mikið að gera...

"Við"... það þýðir að maðurinn er eiginlega einn að mála herbergið sem Svavar var í, það er alltaf heljar mál/röskun að tæma herbergi... og Svavar átti enn fullt af dóti í því, dót sem þurfti að fá stað inni hjá honum.

Maðurinn málaði loftið (áður en ég vaknaði) ég gerði ekki neitt, fór svo út að hlaupa og svo var sólin freistandi... Það væri frábært ef það yrði svona gott veður alla helgina  

Amma stendur sig ekki !

Hvað er að gerast... ég stend mig ekki..
Ég er vön að setja amk afmælisóskir til barnabarnanna hérna á síðuna.

Ég hafði svo mikið að gera í gær við að ná í skottið á Adam Degi afmælisbarni gærdagsins... að ég gleymdi alveg að blogga...

  Innilega til hamingju með 10 ára afmælið hetju-strákur...

Meðfylgjandi er mynd af honum á Helgafelli, en Adam hefur klifið það nokkru sinnum og einu sinni haldið upp á afmælið sitt á toppnum.